Waɗansu waliyyai a Nijar da Nijeriya

A shahararriyar waƙar nan ta “Najeriya Da Nijar” wadda marigayi Alhaji Muhammadu Gao Filinge ya yi, ya na ambatar waɗansu shaihunnai guda biyu, wato Sheikh Usman Ɗanfodiyo da Sheikh Mahaman Dioɓɓo. A yayin da yawancin mu mun san wanene Ɗanfodiyo, ba kowa ba ne zai ce maka ya taɓa jin sunan ɗaya shehin in dai ba a wannan waƙar ba. A wasu wurare ma da na ga an rubuta waƙar, ko sunan shi ba a rubuta daidai ba. Gao Filinge ya kira shi da “Mamman Jaɓɓo”, wanda daidai ne da Hausar mu amma ba a rubutun Hausar Faransa ba. Ban tabbatar ba, amma ina jin ko a Nijar ɗin ma ba a cika maganar shi ba. Allahu Akbar!

A gani na, ya kamata a san wanene Alfa Mahaman Dioɓɓo jikan shehin malami Boubacar Salihou, a yi maganar shi sosai. Dalili shi ne shi ma ya taka muhimmiyar rawa wajen jihadi a wancan zamani, kuma ya assasa gari da masarautar Sayi, wadda ta kasance wani muhimmin yankin Daular Usmaniyya shekaru ɗari kafin zuwan Turawa.

Ɗaya daga cikin mugun gado da mu ka yi daga mulkin mallaka shi ne zuwan Turawa ya datse hulɗar Sakkwato da Sayi, sakamakon yadda ya datse kudancin Nijar da arewacin Nijeriya ta fuskokin zamantakewa, siyasa, tattalin arziki, da al’adu, ya mayar da mu bare ga junan mu har ta kai ga kwanan baya aka riƙa kumfar baki kamar za a haɗa mu yaƙi.

Ga dai abin da Muhammadu Gao Filinge ke cewa a riwayar da ya saƙa cikin wannan fitacciyar waƙar tasa:

JAGORA:

Amma ku bari ina hwaɗa maku ko mig gama,

Najeriya da Nijar daidai duka.

AMSHI:

Waɗansu waliyyai da Jallah yay yi cikin duniya:

Mahaman Dioɓɓo su da Usumana na Hodiyo,

Sun taso su na cikin yawon duniya,

Mahaman Dioɓɓo yats tsaye Sayi da martaba,

Shi kau Usumanu Shehu has Sakkwato can shi ke,

Amma duk cikin dare ɗai haɗuwa su kai su na hirad duniya,

Roƙon Allah su kai shi taimaki dud duniya, Musulmunci shi yawa,