MAWAƘI Aminu Alan Waƙa ya zargi ƙungiyar su ta 13×13 wadda mawaƙi Dauda Kahutu Rarara ya ke jagoranta da yi musu ingiza mai kantu ruwa kan shiga jami’yyar ADP ta su Alhaji Sha’aban Ibrahim Sharaɗa ba bisa sharaɗi ba.
Ya faɗi haka ne a cikin dalilan sa na ficewa daga jam’iyyar ta ADP da kuma jingine takarar da ya tsaya ta ɗan Majalisar Wakilai a Ƙaramar Hukumar Nassarawa, Kano.
Ala ya bayyana waɗannan matakai da ya ɗauka ne a cikin wani saƙon bidiyo da ya fitar, inda ya yi da-na-sanin fitowa ya bayyana kan sa a matsayin ɗan takara a jam’iyyar.
A cewar sa, babu wata takardar shaidar cewa ya na takara da ya gani.
A zargin da ya yi wa Rarara, wanda babban jigon ADP ne a Kano, ya ce ƙungiyar 13×13 ta kasa yin wani kataɓus domin sanar da su matsayin su, kurum an bar su da magana da waɗanda ba su da hurumi.
Mawaƙin ya ce tuni ya aike wa da jam’iyyar da takardar barin su tare da janyewa daga takarar da ya shiga.
Ai Alan waka, Faɗuwa ya hango,…