DA yammacin wannan rana ta Litinin, 23 ga Janairu, 2023 Allah ya yi wa jarumi kuma furodusa a Kannywood, Abdulwahab Awarwasa, rasuwa.
Ya yi rasu a garin Jos bayan ya sha fama da rashin lafiya.
Awarwasa, wanda ɗan asalin unguwar Fagge ne cikin birnin Kano, ya daɗe ana damawa da shi a harkar fim inda ya ke fitowa a matsayin ɗan daba. Ya na daga cikin yaran Ali Nuhu.
Furodusa ne da ya sha shirya finafinai tsawon lokaci.
Wata majiya ta kurkusa da shi ta shaida wa mujallar Fim cewa rashin lafiyar tasa ta ɗan jima, domin bayan ya sha jinya a Kano sai daga baya wani maigidan sa ya ɗauke shi zuwa Jos don yi masa magani, ashe ƙarshen tafiyar kenan.
Marigayin magidanci ne wanda ya ke da mata ɗaya da ‘ya’ya uku.
Ana sa ran zuwa gobe za a kawo gawar sa Kano domin yi masa jana’iza.
Mutuwar sa ta girgiza Kannywood, inda ake ci gaba da baza hotunan sa tare da addu’ar Allah ya jiƙan sa da rahama.
Comment:Allah ya jikansa da rahama.