FURODUSA kuma ɗan kasuwar finafinai a Kannywood, Alhaji Muhammad Rabi’u Koli, ya bayyana farin ciki kan aurar da ‘yar sa ta farko da ya yi a yau Juma’a, 26 ga Mayu, 2023.
An ɗaura auren Hafsat Muhammad Rabi’u (Ummi) da masoyin ta Suraj Tijjani Suraj (Khalifa) da misalin ƙarfe 2:30 na rana a Masallacin Juma’a na Sarkin Musulmi Bello da ke Unguwar Sarki, Kaduna, a bisa sadaki N100,000.
Mahaifin amaryar ya yi godiya ga Allah da kuma waɗanda su ka halarci ɗaurin auren, ya ce, “Alhamdu lillah. Na gode wa Allah da ya nuna mana wannan rana na ɗaurin auren ɗiya ta, wadda ita ce ‘ya ta ta farko. Ban yaɓa aurarwa ba sai wannan karo, saboda haka ina farin ciki. Ina yi wa ango da amarya fatan alkhairi tare da kuma jama’ar da su ka zo daga nesa, Allah ya mai da kowa gidan sa lafiya. Na gode.”
Wakilin mujallar Fim ya lura da cewa abokan sana’ar Alhaji Rabi’u na Kannywood ba su yi masa kara ba, domin babu ko da mutum ɗaya da ya halarci ɗaurin auren.
