JARUMAN nan na Kannywood, Sayyada Raihan Imam (Ƙamshi) da Zulaihat Ibrahim (Zullie), kowacce za ta shirya gagarumin bikin Mauludin Manzon Allah (s.a.w.), a jibi Alhamis, wato 27 ga Rabi’ul Awwal, wanda ya yi daidai da 12 ga Oktoba, 2023.
Taron da Raihan ta shirya Za a yi shi ne a F.C.E., Dulawiya, layin Mu’azu Bin Jabal a cikin birnin Kano.
A sanarwar da ta bayar, jarumar ta ce za a fara taron da misalin ƙarfe 7:00 na dare har zuwa abin da ya sauwaƙa.
Haka kuma za a gabatar da jawabai da kuma ƙasidun yabon Manzon Allah (s.a.w.).
Raihan ta ce ta na gayyatar dukkan al’ummar Musulmi zuwa wajen taron.
Ita kuma Zulaihat, wadda kuma mawaƙiya ce, za ta gudanar da bikin Mauludin ne a Sani Time Street, kusa da masallacin Al-Ansar, unguwar Maidile, cikin Kano.
Kamar yadda aka rubuta a jikin katin gayyatar, za a fara bikin da misalin ƙarfe 7:00 na dare har zuwa wayewar gari.
Jarumar, wadda ake kira Zulaihat Daɗin Kowa, ita ma ta ce ta na gayyatar dukkan ‘yan’uwa da abokan arziƙi zuwa wurin taron.
Allah ya ba da ikon zuwa, amin.
