A YAU Juma’a aka ɗaura auren darakta kuma jarumi a Kannywood, Malam Al-Amin Ciroma, da sahibar sa, Malama Sharifatu Aliyu Buji.
An ɗaura auren a fadar Arɗon Mayo Faram da ke Ƙaramar Hukumar Mayo Belwa, Jihar Adamawa, jim kaɗan bayan an gama sallar Juma’a, a kan sadaki N200,000 wanda angon ya biya lakadan.
Mayo Faram nan ne garin su Al-Amin Ciroma, kuma shi ne Talban garin.
A zantawar sa da mujallar Fim, Ciroma ya ce babu wani ɗan Kannywood da ya samu halartar ɗaurin auren saboda nisa, amma da yawa sun kira shi sun ba da uzuri tare da yi masa fatar alheri.
An ɗaura auren Al-Amin da Sharifatu ne shekaru biyu cur bayan mutuwar auren sa da fitacciyar jarumar Kannywood, Wasila Isma’il.
Shi da Wasila suna da ‘ya’ya biyar a tsakanin su – mata uku, maza biyu – amma ɗaya ya rasu.
Allah ya ba da zaman lafiya da ƙaruwar arziki a wannan sabon auren, amin.
