Kwamitin Amintattu ta Haɗaɗɗiyar Ƙungiyar Masu Shirya Finafinai ya Nijeriya (MOPPAN) ta naɗa fitaccen jarumi Shehu Hassan Kano a matsayin Shugaban Riƙo na ƙasa na ƙungiyar.
Kafin naɗin nasa, shi ne Mataimakin Shugaban ƙungiyar na ƙasa a shiyyar Arewa-maso-yamma.
Shugaban kwamitin , Alhaji Sani Mu’azu Makama, shi ne ya bayyana haka a cikin wata sanarwa da ya rattaba wa hannu a yau.
Alhaji Sani ya ce an naɗa Shehu wannan muƙami ne saboda rasuwar Shugaban MOPPAN na Ƙasa, Alhaji Umar Maikuɗi Cashman, da ta faru kwanan nan.
Ya ce kwamitin amintattun ya zaɓi kuma ya amince da naɗin Alhaji Shehu Hassan Kano domin riƙe wannan muhimmin muƙami.
Ya ce: “Alhaji Shehu Hassan Kano, wanda tsohon jarumi ne a wannan masana’anta, yana da ɗimbin sani da makamar shugabanci da zai yi amfani da su a wannan muƙami.
“Kwamitin Amintattun yana da cikakken tabbacin cewa wannan naɗi zai samar da daidaito tare da ɗorewar harkokin ƙungiyar a daidai wannan lokaci na rashin da aka yi.
“Muna da ɗimbin fatan alheri a shugabancin sa da hangen nesan sa wajen tafiyar da harkokin MOPPAN.”
