MATASHIN mawaƙi a Kannywood, Adamu Mohammed Turaki, zai yi bankwana da kwanan situdiyo a gobe Asabar.
Za a ɗaura auren Adamu Mohammed Turaki, (A. Wamba) da masoyiyar sa Hadiza Hassan Galadima (Hadiza Mamah), a gobe Asabar, 4 ga Fabrairu, 2023, da misalin ƙarfe 11:00 na safe, a fadar mai martaba Sarki Oriye Rindre na Wamba, Jihar Nassarawa.
Kamar dai yadda aka saba, ma’auratan sun yi hotunan kafin aure (pre-wedding pictures), wanda ya burge jama’a.
Sun yi hotunan ne ta yadda kowanne daga cikin su ya nuna irin aikin sa, wato shi ya nuna mawaƙi ne shi, inda ita kuma ta nuna ita malamar asibiti ce.
Abokai da masoya su na ta yi masu fatan alheri da kuma taya su yaɗa katin gayyata da hotunan da su ka yi.
Adamu ɗan asalin Jihar Nassarawa ne, kuma an fi sani da suna A. Wamba a Kannywood.
