1. Jemagu:
Wannan rukunin mafi yawa ‘yan boko ne, da kuma masu ƙaryar boko waɗanda ba wai fim ɗin Hausa ba, su duk wani abu da ya shafi Bahaushe ba sa ƙaunar sa.
Irin waɗannan rukuni sun fi ƙaunar finafinan Turawa, kai sun fi fifita fim ɗin mutanen Kudancin Nijeriya fiye da na Hausa. Su fim duk ma’anar sa da kyawun sa in dai na Hausa ne za su caccake shi ko da kuwa ba su tsaya sun ga abin da ke cikin sa ba.
2. Tattabaru:
Waɗannan rukunin ‘yan gargajiya ne, ‘yan alƙawari, su duk wani abu da ya shafi Hausa suna ƙaunar sa. Don haka duk irin fim ɗin da aka yi da Hausa, duk rashin kyawun sa da rashin ma’anar sa su suna jin daɗin kayan su.
Da yawa daga cikin su, suna da ƙarancin ilimin zamani da kuma wayewa ta zamani. Don haka ko da fim ya zo da shirme ko shashanci, kai ka jiyo, domin kai kake gane shirmen da shashancin, su kallon abin su za su yi, kuma babu abin da ya shafe su, domin abin da ke cikin fim ɗin ya yi daidai da saitin ƙwaƙwalwar su.
Irin su ne za ka yi fim, kana ganin ya yi ma’ana sosai a mahangar ka, amma su sai su ce bai musu kyau ba. Kai kuma in ba ka fahimce su ba sai ka yi ta faɗa kana cewa ga fim mai ma’ana sun ƙi kallo. To ai bai yi daidai da ƙwaƙwalwar su ba ne Malam.
3. Dakilai:
Wannan rukunin suna kamanceceniya da rukunin dakilan mutane (marasa sha’awa). Domin su ba su ma san menene daɗin fim ba. Da wanda ya yi kyau da wanda bai yi kyau ba, da wanda ya yi ma’ana, da wanda aka tafka shiririta su duk ɗaya ne a wajen su.
Ana iya samun rukunin waɗannan ‘yan kallo a cikin jahilai da masu ilimi, ‘yan ƙauye da ‘yan birni, wayayyu da kidahumai, ko’ina akwai irin waɗannan mutane.
Haka nan irin waɗannan mutane za ka ga idan ana kallon fim ana ta ihu ana jin daɗin sa ko kuma ana ta tsaki fim ya ɓata wa mutane rai, za ka ga su babu wani sauyi a fuskar su, domin a wajen su duk ɗaya wai makaho ya yi dare.
4. Gwanaye:
Waɗannan ƙwararrun ‘yan kallo ne, waɗanda ke ɗauke da rariyar tata a cikin kwanyar su. Irin waɗannan rukunin ‘yan kallo na iya kallon fim ɗin Hausa, ko na yammacin duniya, ko na gabashin duniya, kai ko wanne irin fim ma suna iya kallo, amma suna da zaɓi, ba komai suke kallo ba.
Su, in dai fim ya yi ma’ana ya yi kyau to ko daga ina yake za su kalle shi kuma za su yaba masa. Mafi yawan su sun fi daga cikin masu ilimin zamani, amma a kan sami tsirari daga masu ƙarancin ilimin zamani, amma waɗanda ke da buɗewar idanu ta yawon duniya.
Wannan tunani na ne, idan kana da naka, to mu haɗu a comment section. Na san kai ma ko ke ma ba za ki rasa wani ƙarin rukunin ‘yan kallon na fim ɗin Hausa ba.
* Nazir fitaccen marubuci ne mazaunin Birnin Kano
