GIDAUNIYAR Kannywood, wato ‘Kannywood Foundation’, tare da Babban Kwamitin Zartaswa na MOPPAN, sun taya sabon shugaban riƙo na Haɗaɗɗiyar Ƙungiyar Masu Shirya Finafinai ta Nijeriya (MOPPAN), Alhaji Habibu Barde Muhammad, murnar samun shugabancin ƙungiyar da ya yi.
Jami’in hulɗa da jama’a da kyautata al’amuran sadarwa na Gidauniyar Kannywood, jarumi Alhaji Muhammad Kabiru Maikaba, shi ne wanda ya ba da sanarwar taya murnar a madadin gidauniyar.
Maikaba ya ce, “Shugabanci da illahirin al’ummar wannan gidauniya mai albarka na farin cikin taya babban Kwamitin Dattawan Haɗaɗɗiyar Ƙungiyar Masu Sana’ar Finafinan Hausa ta Ƙasa, wato MOPPAN, da irin zuzzurfan tunani da dogon hangen nesa da su ka yi amfani da shi wajen zaƙulo Alhaji Habibu Barde don zama shugaban riƙo na wannan gagarumar ƙungiya ta ƙasa (MOPPAN).
“Haƙiƙa shugabancin wannan gidauniya da mafi yawa na al’ummar wannan masana’anta mai albarka sun yi na’am da marhabin da wannan zaɓi.
“Sanin kowa ne cewa Alhaji Habibu mutumin ƙwarai ne, adali kuma zaƙaƙuri.
“Don haka mu na taya ka murna kuma mu na yi maka addu’ar Allah (SWT) ya taya ka riƙo, kuma ya albarkaci wannan nauyi da ya ɗora maka kuma ya sa ka sauke lafiya.
“Gaba ɗayan mu daga Kannywood Foundation mu na yi maka fatan alkhairi. Mun gode.”
Shi ma a nasa ɓangaren, Babban Kwamitin Zartaswa na MOPPAN (National Central Working Committee, NCWC) ya taya murna ga sabon shugaban riƙon ƙungiyar.
Saƙon taya murnar da ya fito ta hannun sakataren kwamitin, Dakta Ahmad Hashim, ya ce, “A madadin wannan kwamiti mai suna a sama mu na taya sabon shugaban riƙo na MOPPAN, Alhaji Habibu Barde, murnar samun wannan matsayi.
“Mu na yi masa addu’ar Allah ya yi riƙo da hannayen sa, kuma ya ba shi ikon sauke wanann nauyin da aka ɗora masa.
“A matsayin mu na kwamiti wanda shugaban MOPPAN na ƙasa ya ke shugabanta, za mu yi aiki kafaɗa da kafaɗa da sabon shugaba don ganin an ciyar da wannan ƙungiya gaba da ikon Allah da amincewar sa.
“Daga ƙarshe, mu na miƙa saƙon godiyar mu zuwa ga shugaba mai murabus, wato Dakta Ahmad Sarari, bisa kyakkyawan shugabancin wannan kwamiti da kuma MOPPAN baki ɗaya. Mu na masa fatar alheri.”
