Rundunar ‘yan sanda ta Jihar Kano ta dakatar da gudanar da duk wasu ayyuka na Hawan Sallah a Kano wadanda ake sa ran za a yi a farkon mako mai zuwa a duk faɗin jihar.
Kwamishinan ‘yan sanda na jihar, Ibrahim Adamu Bakori, shi ne ya ba da sanarwar a wurin taron manema labarai da ya gudanar a hedkwatar ‘yan sandan da ke Bompai a yau Juma’a.
Ya ce rahotannin tsaro sun nuna cewa akwai rashin damuwa da yiwuwar barazana da ke da alaƙa da Hawan Sallah na bana wanda ka iya jawo tashin hankali da tashin-tashina a jihar.
Ya ce: “Sakamakon tabbatattun rahotannin sirri da aka samu na ƙulle-ƙullen da wasu ɓata-gari da masu ɗaukar nauyin su suke yi na yin amfani da Hawan Sallar, wannan runduna, tare da haɗin gwiwar Gwamnatin Jihar Kano da sauran masu ruwa da tsaki, ta yanke shawarar hana ayyukan Hawan Sallah a faɗin jihar.
Bakori ya ce don tabbatar da tsaron lafiyar jama’a da dukiyoyin su, rundunar ta tanadi isasshen tsaro don a yi sallar Ido a wuraren sallar da aka kebe.
Ya yi kira ga masallata da su kiyaye doka da oda, kuma su kauce wa riƙe duk wani abu da zai ɗaga hankalin mutane kuma an hana Hawzan doki, tseren motoci da tuƙin ganganci.
Ya yi kira ga iyaye da su kula da ‘ya’yan su don kada wasu ɓata-gari su yi amfani da su wajen tada fitina.
“Yayin da muke shagali, mu tuna da cewa zaman lafiya ya fi komai. Mu aje bambance-bambancen da ke tsakanin mu sannan mu yi aiki tare a matsayin ‘yan ƙasa masu bin doka don cigaban jihar mu da ƙasar mu,” inji shi.
