ƘUNGIYAR masu shirya fim ta Arewa, wato Arewa Film Makers Association of Nigeria (AFMAN), ta taya babban furodusa Dakta Ahmad Sarari murna bisa nasarar ta zaɓen halartar taron baje-kolin finafinan Nijeriya na duniya a birnin Toronto na ƙasar Kanada, wato Toronto International Nollywood Film Festival (TINFF) da fim ɗin sa mai suna ‘Kakanda’.
Wannan sanarwar ta fito ne daga shugaban riƙo na AFMAN na ƙasa, Alhaji Salisu Mohammed Officer, wanda ya bayyana farin cikin ƙungiyar da alfahari da irin wannan gagarumar nasara da kamfanin Sarari Klassique Company Limited ya samu.
AFMAN ta bayyana wannan nasarar a matsayin shaidar hazaƙa, hangen nesa da jajircewar Sarari wajen samar da ingantattun finafinai da ke jan hankalin masu kallo a faɗin duniya.
Ƙungiyar ta jinjina wa sadaukarwar da ya yi wajen tabbatar da inganci a harkar fim, lamarin da ba kawai ya sama wa kamfanin sa yabo ba, har ma ya taimaka wajen bunƙasa masana’antar shirya finafinai a Nijeriya, musamman a Arewa.
AFMAN ta ce nasarar Sarari wata hanyar ƙarfafa gwiwa ce ga sauran membobin ƙungiyar.
Ta ce kasancewar sa cikin AFMAN na ƙara wa ƙungiyar ƙima, tare da fatan samun ƙarin haɗin gwiwa da nasarori a gaba.
Ƙungiyar ta yi masa fatan alheri a ci gaba da tafiyar sa ta harkar fim.
Shi dai fim ɗin ‘Kakanda’, ya lashe guraben zaɓe har shida a bikin baje-kolin finafinai na Kaduna (Kaduna International Film Festival) na bana.
Marubucin labarin fim ɗin shi ne Khalid Musa, yayin da Toka McBaror ya bada umurni.
Guraben su ne:
1. Best Indigenous Film
2. Best Editing
3. Best Actor – Male: Sadiq Ahmad as Junaidu
4. Best Actor – Female: Amina A. Shehu as Mairama
5. Best Supporting Actor – Male: Ado Ahmad Gidan Dabino as Malam Ilu
6. Best Supporting Actor – Female: Farida Adamu as Dela.
