ƊAN takarar zama sanata mai wakiltar mazaɓar Kaduna ta Tsakiya (Kaduna Central) a jam’iyyar APC a zaɓen 2023, Alhaji Muhammad Sani Abdullahi (Dattijo), ya amince ‘yan fim da mawaƙa su rubuto masa abubuwan da su ke so domin ya ga rawar da zai taka masu idan ya samu nasara.
Dattijo, wanda shi ne tsohon shugaban ma’aikatan fadar gidan gwamnatin Jihar Kaduna (Chief of Staff) kuma tsohon kwamishinan kasafi da tsare-tsare na jihar (Ministry for Budget and Planning), ya bayyana haka ne lokacin da wasu gungun ‘yan fim da mawaƙa, a ƙarƙashin jagorancin kamfanin Birniwa Concept na fitaccen mawaƙi El-Mu’az Muhammad Birniwa da kuma wakilcin ƙungiyar 13×13 Movement ta ƙasa su ka kai masa ziyara a yammacin shekaranjiya Alhamis domin nuna mubaya’ar su a gare shi tare da bayyana goyon bayan su ga takarar sa.
‘Yan Kannywood ɗin sun kai ziyarar ne domin tabbatar masa da cewar su na tare da shi a tafiyar siyasar sa kuma su na da ƙudirin tallata shi domin ganin ya kai gaci a zaɓen.
A yayin ziyarar, sun tattauna kan muhimman abubuwa na cigaba, waɗanda su ka shafi masana’antar baki ɗaya, musamman a kan rashin cigaban da ake samu da kuma rashin wasu abubuwa da za su sa masana’antar ta kai matsayin yadda takwarorin ta su ke a duniya, ba kawai a kan Kaduna ta Tsakiya da zai wakilta ba.
Haka kuma sun nuna za su ba shi gudunmawar su, shi kuma in Allah ya kai shi wannan wuri a matsayin sa na sanata ya gabatar da ƙudirorin su.
Bugu da ƙari, sun tabbatar masa da cewa za su rubuta ƙudirorin su a rubuce.
Sannan sun yi magana a kan abin da ya faru a lokacin da ɗan Majalisar Wakilai Alhaji Abdulmumini Jibril Kofa ya yi yunƙurin ganin Gwamnatin Tarayya ta samar da ‘Film Village’ a Kano, kuma ƙudirin ya karɓu a majalisa, amma jama’ar Kano su ka ƙi.
Da ya ke mayar da jawabi a gare su, Dattijo ya nuna farin ciki kan goyon bayan su da ya samu, sannan ya amince da su rubuto ƙudirorin su ya duba, ya tantance, ya ga waɗanda su ka shafe da zai iya, ya sa hannu, su ma su sa hannu, sai ya zama sun shiga yarjejeniya tsakanin su da shi.
Mujallar Fim ta ruwaito cewa a yanzu dai ‘yan Kannywood ɗin za su zuba hannun jarin su ne na taya shi kamfen, domin ya kai ga samun wannan kujera don su ma su samu biyan buƙatun su a gwamnatance.
Tawagar ‘yan fim ɗin sun haɗa da El-Mu’az, Baban Kausar, Maryam Aliyu Obaje (Madam Korede), Sakina Mando, Ɗanbashari Birniwa, Babangida Birniwa da sauran su.
