JARUMI kuma darakta a Kannywood, Ali Nuhu, ya taya matar sa Hajiya Maimuna Garba Ja Abdulƙadir murnar ƙara shekara a rayuwar ta.
A yau Lahadi, 1 ga Janairu, 2023 Alin ya ɗora kyawawan hotunan da su ka ɗauka a wurin taron ‘get-together’ da ya shirya mata tare da ‘yan’uwan su da ‘ya’yan su Fatima da Ahmad a Instagram.
Sannan ya yi rubutu da Turanci a ƙasan hotunan, ya ce, “Happy birthday to my lovely wife as the New year begins. May Allah make our bond stronger, guide and protect us, ameen.”
Bayan haka, Ali Nuhu ya yi amfani da wannan rana ya yi juyayin aminin sa, jarumi Ahmed S. Nuhu, wanda ya cika shekara shida cur da rasuwa.
Duk shekara abokan sa’ar Ahmed su na tunawa shi, su na ɗora hotunan sa a soshiyal midiya tare da yi masa addu’a, sannan su na nema masa addu’a da masoyan su.
A yau Ali ya ɗora hoton shi tare da marigayi Ahmed, ya rubuta cewa, “Allah ya jaddada rahama a gare ka Ahmad. Mu na barar addu’a yau shekara 16 da rasuwar ka Ahmad S. Nuhu.”
Kamar yadda mujallar Fim ta ba da labarin, Ahmed, wanda a lokacin rayuwar sa an ɗauka ɗan’uwan Ali ne na jini, ya rasu a ranar Litinin, 1 ga Janairu, 2007 a kan hanyar sa ta zuwa Maiduguri, a daidai Azare, sanadiyyar haɗarin mota tare da abokan sa Abubakar Didos, Hamza da kuma Ahmad Singa Boy. Shi Singa Boy shi ne kaɗai ya rayu a cikin su.
Allah ya jiƙan su da rahama, amin.
