MATASHIN jarumi a Kannywood, Abdoulfatah Omar (Mr Pilo), zai yi bankwana da kwanan shago, domin kuwa za a ɗaura masa aure da abar ƙaunar sa, Ummusalma Musa (Walida), a jibi Asabar.
Za a ɗaura auren ne da misalin ƙarfe 11:30 na safe a gida mai lamba 136, Unguwar Ƙaura, Zaria City, Jihar Kaduna.
Tun a makon da ya gabata ‘yan fim su ka fara taya matashin jarumin murna, inda su ka yi ta ɗora katin gayyatar ɗaurin a shafukan su na soshiyal midiya.
Jarumin ya saki hotunan kafin aure (pre-wedding pictures), su kuma ‘yan fim su ka yi masa kara matuƙa, su na ta ɗorawa a shafukan su.
Mr. Pilo dai jarumi ne mazaunin Zariya, kuma shi ne mamallakin shafin Kannywoodcelebrities.ng a soshiyal midiya.
