ALƘAWARI ya cika. A ranar Juma’a, 19 ga Mayu, 2023 aka ɗaura auren matashin mawaƙin Kannywood, Abba Zakin Hausa, da abar ƙaunar sa, Asiya Muhammad.
An ɗaura auren da misalin ƙarfe 1:00 na rana a Masallacin Juma’a da ke tsohuwar kasuwar unguwar Ɗan Magaji, a Zariya, Jihar Kaduna, a kan sadaki N140,000.
Ango ya shaida wa mujallar Fim cewa babu wani shagali da aka yi, sai wa’azi da mahaifin sa ya shirya, wanda aka yi a masallaci bayan ɗaurin aure.
Amma kuma an buga wasan ƙwallon ƙafa na taya ango da amarya murna a filin wasa da ke cikin Buɗaɗɗiyar Jami’ar Nijeriya (National Open University of Nigeria) da ke Rigachikun, Kaduna, a washegarin ɗaurin auren.
Wasu daga cikin mahalarta ɗaurin auren sun haɗa da Ibrahim Ajilo Ɗanguziri, Zayyanu Extra, Hon. Jamilu A. Hasheem, Sir Jalal Isah, Sani Mai Maggi, Jamilu Jboy Kaduna, Shu’aibu Ɗan Mangu, Faisal Abnur, da sauran su.
Allah ya ba da zaman lafiya da zuri’a ɗayyiba, amin.
