ALLAHU Akbar! Da la’asar ɗin jiya Lahadi, 4 ga Disamba, 2022 Allah ya ɗauki ran Mubarak, ɗa ga fitaccen darakta kuma furodusa mazaunin Zariya, Alhaji Magaji Sulaiman.
Mubarak Yahaya ya rasu da misalin ƙarfe 4:00 na yamma a Kogin Kaduna, wanda ake kira da ‘River Kaduna’, a Kabala Costain, Kaduna, sakamakon wanke ƙafar sa da ya je yi ruwan ya ja shi, kuma har zuwa yanzu ba a ga gawar sa ba.
Marigayin, mai kimanin shekara 19 a duniya, shi ne babban ɗan matar Alhaji Magaji Sulaiman wadda mujallar Fim ta ba ku labarin rasuwar ta da ta faru a ranar Litinin, 22 ga Agusta, 2022, mai suna Hajiya Hannatu Yahaya.
Alhaji Magaji, wansa shi ne mamallakin kamfanin shirya finafinai na Sulson Production, ya shaida wa mujallar Fim a yau cewa Mubarak ya na zaune a Kaduna ne wurin aminin shi Alhaji Magaji, wato tsohon shugaban uwar ƙungiyar masu shirya finafinan Hausa na ƙasa, MOPPAN, Alhaji Abdullahi Maikano Usman, inda ya ke karatu.
Allah ya jiƙan Mubarak da rahama, amin.
