AN ce rana ba ta ƙarya sai dai uwar ‘ya ta ji kunya. To kamar dai yadda aka daɗe ana sanar da ranar ɗaurin auren jarumin Kannywood Adam Abdullahi Adam (Abale) tun a kwanakin da su ka gabata, a wannan rana ta 27 ga Janairu, 2023 aka ɗaura auren sa da sahibar sa Maryam Faruq Sale.
An ɗaura auren a unguwar Na’ibawa Masallacin Uhdu da ke Kano da misalin ƙarfe 2 na rana. Taron ya samu halartar kusan ɗimbin manyan jarumai da masu ruwa da tsaki a harkar fim waɗanda su ka haɗa da Ali Nuhu, Bashir Abubakar Maishadda, Dauda Rarara, da sauran su.
Baya ga haka da yake jurumin na matasa ne an samu cinkoson matasa sosai da su ka zo wajen.
Mujallar Fim ta lura da yadda su ma ‘yan siyasa su ka cika wurin kasancewar angon ɗan takarar Majalisar Tarayya a Ƙaramar Hukumar Kumbotso a jam’iyyar ADP hakan ya sa wajen ya zama babu masaka tsinke, don haka ko bayan an ɗaura auren da ƙyar angon ya iya barin wajen. Har sai da ta kai ga ya fito da kan sa daga cikin motar ya na ɗaga hannu tare da yi wa jama’a godiya. Da haka aka samu hanyar fita daga wajen zuwa masaukin da aka tanadar domin hutawa da kuma cin abinci.
A cikin daren kuma aka shirya wani gagarumin taron dina a Meena Events Centre inda ‘yan fim su ka halarci wajen domin taya ango da amarya murnar shagalin bikin nasu.
Da fatan Allah ya ba da zaman lafiya da fahimtar juna.
