SHUGABAN ƙungiyar ƙwararru ta masu shirya fim ta ƙasa, wato ‘Motion Picture Association of Nigeria’ (MOPPAN), Dakta Ahmad Sarari, ya bayyana irin ƙoƙarin da ‘yan fim ɗin Hausa su ka yi, wajen wayar da kan jama’a kan hanyoyin rigakafi game da cutar nan ta koronabairus (‘COVID-19’).
A hirar da ya yi da mujallar Fim, Sarari ya faɗi yadda ƙungiyar tasa ta fito da hanyoyin da membobin ta za su bi domin yin yunƙuri a ɗaiɗaikun su ko a tare domin wayar wa da jama’a kai dangane da wannan muguwar annobar.
Ya ce: “Tun daga lokacin da wannan annobar ta ‘COVID-19’ ta bayyana a ƙasar nan, matakin da mu ka ɗauka na farko domin kariya ga kan mu da masana’antar mu shi ne tsayar da duk wani aiki a masana’antar domin gudun cunkoson da zai kawo yaɗuwar cutar, kuma mu ka yi kira cewar kowa ya bayar da tasa gudunmawar wajen wayar da kan jama’a game da wannan annobar, kuma a take mu ka aika da saƙon menene cutar kuma ta ina za mu kare kawunan mu.
“Sannan kuma mun umarci marubuta da su rubutu ‘scripts’ na daƙiƙoƙi 60 a kan kare kai daga wannan cutar a inda na yi alƙawarin biyan naira dubu ashirin ga duk sikirif ɗin da aka rubuta ya kai matakin da zai isar da saƙon da ake so a isar.
“Sannan mu ka samar da kwamitin na masu duba sikirif ɗin waɗanda su ka haɗa da Khalil Musa, Ahmad Alkanawy Nasir B. Muhammad, Nasiru Gwangwazo, Ishaq Sidi Ishaq da Kamal S. Alƙali, wanda kuma tuni aka yi aikin aka gama har ma an fitar da wasu ayyukan ga jama’a domin faɗakarwa.”
Sarari ya yi kira ga jama’a da su tashi tsaye wajen kare kan su tare da sauran jama’a, domin kiyaye kai daga wannan annobar.
