A YAU Alhamis za a fara shagulgulan bikin auren daraktan fim ɗin nan mai dogon zango na ‘Izzar So’, wato Aminu Al-Rahuz, wanda za a ɗaura wa aure da sahibar sa, Bilkisu Muhammad Bello.
Za a fara bikin ne da wata ƙasaitacciyar dina da za a gudanar a Ado Gwanja Event Centre da ke bayan Jami’ar North-west a unguwar Kabuga, Kano, da misalin ƙarfe 8 na dare.
A gobe kuma, 3 ga Fabrairu, 2023 da misalin ƙarfe 11 na rana za a yi taron ɗaurin aure a gidan Alhaji Idris Bello da ke kusa da Makarantar Ahmadiyya a unguwar Birged, Kwanar Jaba, inda daga nan za a ci gaba da sauran sha’anonin bikin.
