HUKUMAR Tace Finafinai ta Jihar Kano ta soke dukkan wata takarda ta ba da izinin gudanar da duk wani aiki a masana’antar Kannywood a jihar.
Dokar ta shafi jarumai furodusoshi, daraktoci, masu ɗaukar hoton fim, masu kwalliya, kamfanonin shirya fim da duk wani aikin shirin fim.
Shugaban hukumar, Alhaji Abba El-Musatapa, shi ne ya sanar da hakan a wata takarda da ya rattaba wa hannu a yau Juma’a, 28 ga Yuli, 2023
A lokacin da yake yi wa mujallar Fim ƙarin bayani dangane da sanarwar, El-Mustapha ya ce: “Wannan mataki ya zama dole a ɗauke shi domin kawo gyara da kuma tsaftace sana’ar fim saboda wani hali da ta shiga. Don haka an dakatar da lasisin duk wani ɗan fim har zuwa nan gaba da za a samar da wani tsari na ba da lasisin cikin yanayi mai kyau.
“Don haka duk wani lasisi da ya ke hannun mutane ko wani katin shaida daga yanzu ya daina aiki.”
Mujallar Fim ta ruwaito cewa an daɗe ana ƙorafi kan yadda ake bayar da lasisin shiga harkar fim, musamman yin rajista ga jarumai da kuma katin shaida wanda wasu su ka mayar da shi wata harkar kasuwancin da su ke samun ƙazamar riba a wajen duk wata baƙuwar mace da ta shigo Kano da sunan za ta yi fim.
Mutanen da su ke aikata hakan da sunan cewa su furodusoshi ne ko daraktoci su kan tatsi mata kuɗi da sunan za su yi masu rajista da hukumar tace finafinai ta ƙarƙashin kamfanonin su.
Akwai wani furodusa da wata yarinya ta daga Nijar a shekarar da ta gabata inda ya karɓi kuɗi N100,000 a wajen ta da sunan zai yi mata rajistar da kuma katin shaida na Hukumar Tace Finafinai.
Haka ma akwai wani darakta da wata yarinya da ta zo daga Taraba ta kai ƙarar sa ga hukumar a kan ya karɓi kuɗin ta N80,000 da sunan zai samo mata katin shaida na hukumar a cikin mako guda, amma sai aka shafe tsawon watanni ba tare da ya samo mata ɗin ba.
Sannan wasu su kan yi amfani da wannan damar ta yadda karuwai su ke fitowa daga cikin Sabon Gari su yi rajista da hukumar ta yadda duk inda su ka je aka kama su sai su ce su ‘yan fim ne.
El-Mustapha bai faɗi tsawon lokacin da wannan soke lasisin zai kai ba.
