FITACCEN jarumin Kannywood, Adam A. Zango, ya tabbatar da rabuwar sa da matar sa, jaruma Maimuna Musa, bayan kusan watanni 11 da ɗaura auren su, yana mai bayyana cewa gwajin ƙwayoyin halitta na jini (genotype) ne ya nuna cewa su biyun masu nau’in AS ne, lamarin da ya sa suka yanke shawarar kawo ƙarshen auren domin kauce wa matsalolin da ka iya shafar ‘ya’yan su a nan gaba.
Jarumin ya bayyana hakan ne a cikin wani saƙo da ya wallafa a shafukan sa na sada zumunta cikin harshen Turanci, inda ya ce:
“Yes, it is true that we discovered we have the same genotype. I am AS, and she is also AS. Please, I kindly ask everyone not to turn this personal matter into an issue or spread false information. I only want my fans to understand the reason behind the end of our marriage, while respecting the privacy and dignity of everyone involved. As you can see, this video was recorded today as she was leaving my house happily.”
Fassarar saƙon nasa shi ne:
“E, gaskiya ne mun gano cewa muna da irin ƙwayar halittar jini iri ɗaya. Ni AS ne, ita ma AS ce. Ina roƙon kowa kada ya mayar da wannan batu na wata babbar muhawara ko ya yaɗa bayanan ƙarya. Abin da kawai nake so masoya na su fahimci ainihin dalilin da ya sa auren mu ya zo ƙarshe, tare da mutunta sirri da martabar duk wanda abin ya shafa. Kamar yadda kuke gani, an ɗauki wannan bidiyon ne a yau yayin da take barin gida na cikin farin ciki.”
Kafin wannan sanarwa, an shafe kwanaki ana yaɗa ji-ta-ji-tar cewa ma’auratan sun rabu. Rahotanni sun nuna cewa batun ya fara yawo ne a tsakanin masu ruwa da tsaki a masana’antar Kannywood, musamman a wuraren ɗaukar finafinai (lokeshin), kafin daga bisani ya bazu a kafafen sada zumunta.
A ranar Juma’a ne dai lamarin ya ƙara ɗaukar hankalin jama’a, yayin da kafafen sada zumunta da na yaɗa labarai na yanar gizo suka cika da rahotanni da muhawara kan rabuwar ma’auratan.
Haka kuma, wani bidiyo ya nuna lokacin da ake kwashe kayan Maimuna daga gidan Adamu. Wasu daga cikin ‘yan jarida sun samu damar tattaunawa da jarumar, inda ta tabbatar da cewa rabuwar tasu ta tabbata.
Bayanin da Zango ya fitar ya kawo ƙarshen ji-ta-ji-tar da ake yaɗawa, tare da fayyace cewa rabuwar tasu ba ta samo asali ne daga saɓani ko rikicin zaman aure ba, sai dai bayan da gwajin ƙwayoyin halitta na jini ya nuna cewa su biyun masu genotype AS ne.
Rabuwar tasu ta sake jawo hankalin jama’a kan tarihin rayuwar auren jarumin, domin wannan shi ne karo na bakwai da ake rahoton auren sa ya zo ƙarshe.
Adam A. Zango dai ya taɓa bayyanawa, bayan rabuwar sa da tsohuwar matar sa, Safiyya Umar Chalawa, cewa ba zai ƙara yin aure ba har abada. To amma daga baya ya canja wannan matsayin nasa, ya auri Maimuna.
Mujallar Fim ta ruwaito cewa auren Zango da Maimuna bai cika shekara guda ba. Kamar yadda muka ba ku labari a ranar 19 ga Agusta, 2025, an ɗaura auren ne a ranar Lahadi, 18 ga Agusta, 2025, jim kaɗan bayan an sallamo jarumin daga asibiti, inda ya yi jinya na wani lokaci sakamakon mummunan haɗarin mota da ya ritsa da shi yayin da yake kan hanyar sa ta zuwa Kano domin halartar wasan Sallah.
Auren ya ɗauki kusan watanni 11 da wasu ‘yan kwanaki kafin ya zo ƙarshe.
