ƘUNGIYAR ‘yan fim ta Kannywood Film Industry Guilds & Associations of Nigeria (KAFIGAN) ta shirya ƙaddamar da sabon reshen ta na Jihar Kaduna a wani gagarumin biki da za a gudanar a wannan Asabar ɗin, 3 ga Oktoba, 2026.
Bisa bayanan da ƙungiyar ta fitar, za a gudanar da bikin ƙaddamarwar da ƙarfe 7:30 na dare a otal ɗin NUT da ke Magadishu Layout, Kaduna.
Gwamnan Jihar Kaduna, Sanata Uba Sani, shi ne aka sanya a matsayin babban baƙo na taron, yayin da Mai Martaba Sarkin Zazzau, Ambasada Ahmad Nuhu Bamalli, zai kasance uban taron.
Haka kuma, Kakakin Majalisar Wakilan Nijeriya, Dakta Tajudeen Abbas, zai kasance cikin manyan baƙi.
Sauran manyan baƙin da aka gayyata sun haɗa da Manajan Darakta na Hukumar Finafinai ta Nijeriya (Nigerian Film Corporation, NFC), Jos, Jihar Filato, Dakta Ali Nuhu Muhammad; da Mataimakiyar Darakta ta II a Sashen Shirye-shirye ta Ƙasa (National Events and Engagement) na kwamitin yaƙin neman zaɓen Tinubu a zaɓen 2027, Hajiya Mansurah Isah; da Babbar Mataimakiya ga Gwamnan Jihar Kaduna, Hajiya Saratu Abdulaziz.
Haka kuma, Marafan Yamman Zazzau, Malam Mustapha Adamu Ubaidu, shi ne aka sanya a matsayin babban mai gabatar da jawabi a wajen taron.
Sauran baƙi sun haɗa da Shugaban Karamar Hukumar Kaduna ta Arewa, Hon. Muhammad Gambo, da Shugaban Ƙaramar Hukumar Makarfi, Hon. Garba Muhammad Sabon Gari (Yariman Maƙarfi).
Shugaban kwamitin shirya taron kuma Kodineta na KAFIGAN, reshen Jihar Kaduna, Dakta A.S. Bello, shi ne babban mai masaukin baƙi na bikin.
KAFIGAN dai ƙungiya ce da ta haɗa ƙungiyoyi da ƙungiyoyin ƙwararru daban-daban na masana’antar finafinan Kannywood, da nufin haɗa kan masu ruwa da tsaki da kuma bunƙasa masana’antar.
Taken da ƙungiyar ta yi amfani da shi a sanarwar bikin shi ne: “One Voice. One Industry. Endless Possibilities”, wato “Murya Ɗaya. Masana’anta Ɗaya. Damar da ba ta da iyaka.”
