NA karanta tsokacin da Alhaji Hamisu Iyan-Tama ya yi a mujallar Fim kan haramcin yin fim a kan kidinafin, shaye-shaye da ƙwacen waya kamar yadda Hukumar Tace Finafinai ta Jihar Kano ta sanar. Sai dai ina da ɗan tsokaci da na ke son yi kan abubuwan da Iyan-Tama ya rubuta, kamar haka:
1. Ya nuna ilimin da ya ke da shi a cikin sana’ar fim. Wannan gaskiya ne duba da daɗewar sa a cikin sana’ar da matakan nasara da ya taka.
2. Ya bayyana ƙa’idoji da tsare-tsare na Gwamnatin Tarayya. Amma na rasa ganin wata saɗara a cikin dokokin da ta haramta yin finafinai da ke ɗauke da abubuwan da ake magana a kan su.
3. Ya bayyana ƙarara yiwuwar daina fim idan buƙatar hakan ta taso. Amma bai zayyana tanade-tanaden da ya kamata a gan su a ƙasa ba ko ba wa gwamnati shawara a kan abin da ya kamata ta yi domin guje wa asara da rashin fahimta.
4. Ya bayyana rabe-rabe (classification) na fim da kowane rukunin mutane ya kamata su kalla. Amma na kasa gane menene laifin furodusoshi da su ke samar da kowane ‘classification’ na fim bisa doka. Ko ko haƙƙin furodusa ne saka hatimin tantance kowanne fim? Ko ko haƙƙin su ne bada izinin kallon fim a gidaje da wurin kallo?
5. Ya bayyana shiriya a wurin Allah ta ke, ya kuma nuna fim na dabanci bai ɓata irin su ba da sauran mutane. Amma ya gaza bada misali da wani fim na wannan zamani da ya ɓata mutane. Ko shiriyar ta Allah ta ƙare ne?
6. Ya bayyana cewa Afakallah ya ɓata rawar sa da tsalle wurin ɓatawa da jama’a. Wataƙila Afakallah a kan doka da oda ya ke tafiya ko kuma su waɗannan mutane ma’abota karya doka ne. Cikin biyu dai a yi ɗaya!
7. Ya soki Afakallah wurin karya masa tattalin arziki da hana shi fitar da fim ɗin sa. Amma ya manta irin dokokin da ya zayyana a baya su ne su ka hana fitar da fim ɗin saboda ya saɓa wa dokokin tace finafinai na Jihar kano.
8. Ya bayyana rashin ba shi kuɗin gudanar da aikin kwamitin kasuwancin fim da ya jagoranta a matsayin rashin adalci. A nan, akwai alamar kawo kuka da ladabi wurin Hukumar Tace Finafinai domin samun makoma.
Kaɗan daga cikin tsokaci na kenan.
* TY Shaban fitaccen furodusa ne, mawaƙi kuma jarumi a Kannywood
Copyright © Fim Magazine. All rights reserved
www.fimmagazine.com
