Haihuwa ta 13: Baba Ari ya samu Nana Khadija

A DAREN Juma’a, 5 ga Afrilu, 2024 Allah ya azurta jarumin barkwanci a Kannywood, Malam Aminu Ali, da ‘ya mace.

Amaryar sa, Fatima Aminu (Ummi), ta haihu da misalin ƙarfe 12:46 na dare a asibitin Mariri da ke Ƙaramar Hukumar Kunmbotso, Kano.

Aminu, wanda aka fi sani da Baba Ari, ya raɗa wa jaririyar suna Nana Khadija.

Jarumin ya shaida wa mujallar Fim cewa matan sa biyu: Uwargida Hajiya Farida da amarya Fatima (Ummi). ‘Ya’yan sa 12, maza biyar, mata 7.

Allah ya raya Nana Khadija, ya kuma albarkaci rayuwar ta.