FITACCEN jarumin barkwanci ɗin nan a finafinan Kudu (Nollywood), John Okafor, wanda ake yi wa laƙabi da Mista Ibu, ya rasu a yau Asabar da yamma.
Ya rasu ne bayan an garzaya da shi sashen kulawar gaggawa (ICU) na Asibitin Evercare da ke unguwar Lekki a Legas kwanaki kaɗan da su ka gabata.
Mujallar Fim ta ruwaito cewa Mista Ibu ya rasu ya na da shekaru 62 a duniya sakamakon bugun zuciya bayan ciwon sa ya tashi kamar mako ɗaya da ya gabata.
Idan kun tuna, a watan Oktoba 2023 labari ya ɓulla na rashin lafiyar da ya yi har ya na neman agajin kuɗi.
A Nuwambar 2023 kuma iyalan sa su ka bayyana cewar an yanke masa ƙafa ɗaya don kada ya mutu.
Tsohon manajan sa, Emeka Chochoo, ya faɗa wa jaridar Punch a watan Nuwamba da ya gabata ɗin cewa tilas ta sa aka yanke ƙafar domin wani rauni ya cinye masa hanyoyin jini a ƙafar wanda ba a gano shi da wuri ba.
Iyalan mamacin sun tabbatar da mutuwar jarumin ga manema labarai.
Shi ma Shugaban Ƙungiyar Jarumai ta Nijeriya (AGN), Emeka Rollas, ya tabbatar da mutuwar.
Labarin wannan babban rashi ya girgiza ‘yan Nollywood da dama da kuma masoyan sa masu kallon finafinan sa.
‘Yan Nollywood na ta tura saƙonnin ta’aziyya a soshiyal midiya.
Jaruma Mercy Johnson Okojie ta ce, “Sai godiya… Allah jiƙan ka oga…”
Ita kuma Ruth Kadiri ta ce, “Allah jiƙan ka Baba.”
Wannan mutuwa ta Mista Ibu ta biyo bayan rasuwar wani jarumin na Nollywood, wato Tolani Quadri Oyebamiji, wanda aka fi sani da Sisi Quadri, wanda ya rasu a jiya Juma’a aka rufe shi a yau a garin su na Iwo, a Jihar Osun.
