Fitaccen furodusa kuma jarumin barkwanci, Ayatullahi Tage, shi ma dai zai kasance cikakken mutum, zai rabu da kwanan shago.
A ƙarshen wannan makon da muke ciki ne jarumin zai angwance da amaryar sa Hauwa Muhammad Isah (Hauwa Madu).
Kamar dai yadda ya bayar da sanarwa, Ayatullahi ya ce, “Alhamdu lillah! Ina mai farin cikin gayyatar ‘yan’uwa da abokan arziki ɗaurin aure na a ranar Lahadi, 17 ga Nuwamba, 2024, da misalin ƙarfe 11 na safe.
“Za a haɗu a kan titin gidan Zoo a Gidan Ɗan’asabe kusa da ofishin mawaƙi Dauda Kahutu Rarara. Sannan kuma za a ɗaura auren a unguwar Tudun Murtala Kwanar Tifa bakin Sabon Rami. Allah ya bada ikon zuwa amin.”
Ayatullahi Tage dai yana ɗaya daga cikin jaruman barkwanci da suka shahara tun bayan rasuwar Rabilu Musa Ɗanlasan (Ibro).
Sannan furodusa ne da ya ɗauki nauyin shirya finafinai na barkwanci masu yawa, kuma ƙwararren mai ɗaukar hoto ne, da kuma ƙawata wajen shirya fim.
