A MATAKIN kusa da na ƙarshe na tantance labaran da suka yi fice a gasar rubutun gajerun ƙagaggun labarai ta mata zalla, wato Hikayata, ta bana, an zaɓi aƙalla labarai guda 15 da suka yi fice a gasar ta bana.
A sanarwar da BBC Hausa suka bayar, sun ce haka zalika alƙalan sun zaɓi labarai guda uku da suka zama zakaru waɗanda nan gaba kaɗan za a wallafa su a matakin ƙarshe na gasar.
Gasar dai shiri ne na BBC Hausa domin haɓaka rubutun Hausa tare da ba mata ƙarfin faɗin bakin su.
A sanarwar, BBC Hausa sun ce tun da farko sun samu labarai kimanin 450 da marubuta suka aika masu, inda kuma bayan tankaɗe da rairaya sai aka miƙa labarai 400 ga alƙalai na sahun farko waɗanda duka masana harshen Hausa ne, kuma malaman jami’a, suka tantance suka zaɓi guda 30.
A cikin 30 ɗin ne kuma alƙalan na ƙarshe suka zaɓi guda 15, inda uku daga ciki suka zama zakaru sannan 12 suka cancanci yabo.
Labaran da aka tantance dai su ne kamar haka:
- Buɗaɗɗiyar wasiƙa
- Baƙon Wata
- Mugun Nama
- Halitta Biyu
- Unguwar Zoma
- Mafitarmu
- Waye Sanadi?
- Magaribar Jaki
- Naɗin Jaki
- Biyu Babu
- Amon ‘Yanci
- Kura A rumbu
- Tsalle Ɗaya
- Tsayuwar wata
- Yi Wa Kai
A ranar 27 ga wannan watan nan na Nuwamba ne za a gudanar da bikin karrama gwarazan a Abuja, babban birnin Nijeriya.
Waɗanda suka yi nasara za su samu kyautar kuɗi da lambar yabo waɗanda suka ƙunshi N1,000,000 (nairan miliyan ɗaya) ga wadda ta zo ta ɗaya, N750,000 (naira dubu ɗari bakwai da hamsin) ga wadda ta zo ta biyu, da N500,000 (naira dubu ɗari biyar) ga wadda ta zo ta uku.
BBC za ta watsa labarai 12 da alƙalan suka ce sun cancanci yabo da guda ukun da suka yi nasara a tashar ta ta BBC Hausa.
