BABBAN furodusa a Kannywood, Malam Kabiru Musa Jammaje, ya sha alwashin samar da cigaban da zai kawo sauyin da masana’antar shirya finafinan yadda za ta riƙa gudanar da harkokin ta cikin tsari na zamani.
Jammaje, wanda kuma shi ne shugaban makarantar ‘Jammaje Academy’ da ke Kano, ya bayyana haka ne a lokacin tattaunawar da mujallar Fim ta yi da shi dangane da tsarin da ya fito da shi na samar da ajin koyar da harkar fim, wato ‘Acting Class’, wanda har makarantar ta fara yaye ɗaliban da ta koyar a zango na farko.
Ya ce, “Mu na da kishin harkar fim ne da kuma al’adun mu na ƙasar Hausa, don haka ne mu ka shiga harkar fim wanda mu ka zuba kuɗin mu domin shirya fim ɗin.
“Masu kallo sun tabbatar da hakan a finafinan da mu ka yi a kamfanin Jammaje, domin ka ga finafinan mu kamar ‘There’s a Way’, ‘Light and Darkness’, ‘This is the Way’ da kuma ‘In Search of the King’ sun tabbatar da hakan, saboda finafinai ne da ba a nan ƙasar ba, har a ƙasashen waje an kai su an haska wanda kuma hakan ya dawo da martabar al’adun mu na ƙasar Hausa, musamman abin da ya shafi tsarin sarakunan mu da kuma zamantakewar mu.
“Don haka mu ke ganin za mu iya cimma nasara nan gaba, musamman ta ɓangaren ‘Acting Class’ da mu ka buɗe wanda domin samar da jarumai masu ilimi da ƙwazo a kan sana’ar fim ɗin.”
Jammaje ya yi kira ga masu harkar fim da su riƙa saka ilimi da wayewa a cikin aikin su yadda masana’antar za ta riƙa tafiya daidai da zamani.
