TSOHON furodusan nan Yakubu Gwammaja, wanda aka fi sani da Yakubu Furodusa, ya bayyana cewa kishin da ya ke da shi a game da Kannywood ne ya sa ya dawo harkar fim bayan tsawon lokaci da ya yi ba a ganin sa.
Yakubu Furodusa ya bayyana haka ne a lokacin da yake tattaunawa da mujallar Fim a game da dawowar tasa, inda ya ce:
“Mu ba baƙi ba ne a cikin harkar fim, domin sama da shekaru 25 ina cikin Kannywood. Kuma a baya na yi finafinai da dama a matsayin furodusa, sai dai daga baya ya zama ba a gani na a cikin harkar, amma dai ba don na fita ba, sai don wasu harkokin kasuwanci da na saka a gaba.”
Ya ci gaba da cewa, “Amma saboda kishi da kuma son ci-gaban masana’antar ya sa a yanzu na dawo cikin ta. Za a ci gaba da damawa da ni, saboda da man gidan mu ne.”
Ya ƙara da cewa, “A baya kowa ya san ni a matsayin furodusa ne wanda na ke zuba kuɗi na yi fim. To amma a yanzu abu biyu zan haɗa: ina matsayin furodusa, kuma zan ci gaba da fitowa a matsayin jarumi.
“Don haka a yanzu na fito da shiri na don ganin na samar da ci-gaba a cikin masana’antar.”
A game da yadda harkar ta sauya kuwa, furodusan ya ce, “Duk wata harka ta kasuwanci ta na tafiya ne da zamani. Don ka ga a farko mu na amfani da kaset na bidiyo ne, aka dawo sidi, aka dawo dibidi, kuma duk a yanzu an daina yayin su an koma YouTube channel da gidajen talbijin. Don haka a yanzu duk wanda zai yi harkar fim a duniya, to dole ne ya yi amfani da hanyoyin da zamani ya zo da su, idan kuma ba haka ba, harkar ba za ta yiwu ba a wajen sa.”
Yakubu ya yi kira ga abokan sana’ar sa da su haɗa kai domin a samu ci-gaban da a ke buƙata a masana’antar.
