ALLAHU Akbar! Allah ya ɗauki ran Alhaji Musa Balannaji, mahaifin sanannen marubuci kuma furodusa Zubairu M. Balannaji a shekaranjiya Asabar, 21 ga Oktoba, 2023.
Dattijon ya rasu ne bayan wani gajeren rashin lafiya, inda likitoci a asibitin Sheikh Muhammad Jidda da ke Kuroda a cikin garin Kano su ka tabbatar da rasuwar sa bayan gwaje-gwajen da su ka yi.
Marigayin mai shekaru 68 a duniya, ya rasu ya bar mata uku da ‘ya’ya 18 da jikoki 37. Tuni aka yi jana’izar sa a gidan sa da ke unguwar Ɗorayi Caranci a cikin garin Kano.
Marubuci kuma furodusa Zubairu M. Balannaji ya na ɗaya daga cikin ‘ya’yan mamacin, kuma ya bayyana rasuwar mahaifin nasa da cewa, “Gaskiya abu ne da ba zai iya kwatantuwa ba. Wanda ya taɓa ɗanɗana maraici irin na managarcin uba kamar namu shi ne kaɗai zai fahimci irin zafi da raɗaɗin da mu ke ji. Duk da ma mu zafin biyu ne ya haɗe mana, don watanni huɗu kenan da rasuwar ƙanwar mu, Maryam M. Balannaji, wacce ta rasu a sanadiyyar haihuwa.
“Ina roƙon Allah subhanahu wa ta’ala ya gafarta wa mahaifi na dukkan kurakuran sa, ya yi masa tukwici da Aljanna mafi ƙololuwar daraja da ɗaukaka, shi da sauran al’ummar Musulmi.”
To, amin Malam.
