ALLAHU Akbar! Allah ya ɗauki ran mahaifiya da yayan jarumi a Kannywood, Alhaji Tanimu Akawu.
Hajiya Amina ta rasu ranar Asabar, 28 ga Oktoba, 2023 daidai lokacin sallar magariba, a gidan ‘yar ta da ke Layin Zana a cikin garin Jos, Jihar Filato. Ta rasu ba tare da rashin lafiya ba.
An jana’izar ta da misalin ƙarfe 7:00 na safe a Layin Zana, daga nan aka kai ta gidan ta na gaskiya.
Marigayiyar, mai kimanin shekaru 80 a duniya, ta rasu ta bar ‘ya’ya uku – biyu mata, namiji ɗaya.
Tanimu Akawu ya shaida wa mujallar Fim cewa su bakwai ta haifa, amma huɗu sun rasu.
Kafin rasuwar ta, babban ɗan ta, Alhaji Mustapha Uba Tanimu, wanda yaya ne ga shi Tanimu, ya rasu a daren Alhamis, 19 ga Oktoba a kan hanya za a kai shi asibiti a Jos. Tsakanin sa da mahaifiyar sa, kwana tara kacal.
Tanimu Akawu ya kuma shaida wa wakilin mu cewa dukkan ‘yan fim na Jos sun je jana’iza da ta’aziyya, haka kuma ‘yan fim ɗin Kano irin su Ali Nuhu, Tahir Fagge da Hadizan Saima duk sun kira shi a waya sun yi masa gaisuwar rasuwar.
Allah ya rahamshe su, amin.
