A KARON farko, Gwamnatin Tarayya ta ƙaddamar da shirin bada lamuni ga matan karkara, wato ‘Special Grant for Rural Women’.
Ministar Harkokin Jinƙai, Agaji da Inganta Rayuwa, Hajiya Sadiya Umar Farouq, ita ce ta ƙaddamar da shirin a Jos, hedikwatar Jihar Filato.
A ƙarƙashin shirin, sama da mata 150,000 ne za a yi wa biya ɗaya rak na kuɗi N20,000 kowacen su a kowace daga cikin ƙananan hukumoni 774 da ke faɗin ƙasar nan.
A wajen ƙaddamar da sabon shirin wanda aka yi a ɗakin taro na Gidan Gwamnati a Jos, ministar ta ce biyan sau ɗaya ne za a yi wa mace don bikin tunawa da Ranar Matan Karkara ta Duniya (International Day of Rural Women).
Sadiya ta ce: “Tun daga zuwan gwamnatin Shugaba Muhammadu Buhari a cikin 2015, gwamnati ta yi ta bada fifiko ga kula da halin da talakawa marasa galihu na ƙasar nan ke ciki tare da tallafa masu. Hakan ne ya sa aka yanke shawarar shigo da Shirin Inganta Rayuwa na Ƙasa, wato ‘National Social Investment Programme’ (NSIP) a matsayin wata dabara ta kyautata zamantakewar jama’a.
“An ƙirƙiro Shirin Bada Lamuni ga Matan Karkara ne domin a inganta manufar zamantakewa da gwamnatin Buhari ke da ita, wanda ya haɗa da buƙatar ceton ‘yan Nijeriya miliyan 100 daga ƙangin fatara a cikin shekaru 10. An tsara shi yadda zai samar da biya ɗaya rak na lamuni ga wasu daga cikin matan da su ka fi kowa fatara a yankunan karkara na Nijeiya.
“Za a raba kuɗi N20,000.00 ga mata masu fatara su sama da 150,000 a yankunan karkara da ke faɗin jihohi 36 na ƙasar nan da Yankin Birnin Tarayya.
“Ana sa ran kuɗin za su bada damar samun jarin yin sana’a wanda ake buƙata don hadahadar kasuwanci.
“Fatar mu ita ce waɗanda su ka amfana da wannan shiri za su yi amfani da wannan damar wajen inganta kuɗin da su ke samu, da sama wa kan su abinci da kuma uwa-uba bada gudunmawa ga kyautata rayuwar su ta yau da kullum.”
Sadiya Umar Farouq ta kuma gode wa Ministar Harkokin Mata, Madam Pauline Tallen, saboda gudunmawar da ta bayar ga cimma nasarar ƙaddamar da shirin a Jihar Filato.
Haka kuma ta yi amfani da wannan damar ta raba hatsi iri daban-daban daga Rumbun Abinci na Ƙasa (National Food Reserve), bisa amincewar Shugaban Ƙasa Muhammadu Buhari, a matsayin taimaka wa masu ƙaramin ƙarfi waɗanda zaman dole na annobar korona ya shafa.
Kayan abincin da aka raba a jihar sun haɗa da tirela 71 shaƙe da masara, dawa da gero waɗanda za a ba gidaje 294,199.
Tun da farko, sai da Gwamnan Jihar Filato, Mista Simon Bako Lalong, ya bayyana matuƙar farin ciki ga ministar saboda ziyarar da ta kai a jihar.
Ya yi nuni da rawar da mata ke takawa a cikin al’umma, musamman matan karkara.
Ya ce, “Wannan kayan agajin za su taimaki mutane marasa ƙarfi da annobar korona da sauran bala’o’i su ka shafa, irin su rikicin ɓangaranci da ambaliyar ruwa.
“Wannan taro dai na musamman ne domin kuwa ya ƙunshi raba kuɗin tallafi ga matan karkara 500 don tunawa da Ranar Matan Karkara ta Duniya.
“Haka kuma ina farin cikin ganin cewa ana ba mata masu ciki da masu shayarwa su 3,005 a Jihar Filato ƙarin naira dubu biyar kowacen su a shirin nan na tiransifar kuɗi bisa ƙa’ida, wato ‘Conditional Cash Transfer’ (CCT).
“Hakan zai taimaka gaya wajen inganta rayuwar mata da ƙananan yara a Jihar Filato, musamman ta fuskar kiwon lafiyar su da ba su ƙarfin yin sana’a.”
Gwamna Lalong ya ce gidaje masu fatara guda 26,004 a jihar sun riga sun amfana da kuɗi N10,00 da ake biya sau biyu a wata a ƙarƙashin shirin CCT, a yayin da wasu gidaje 47,000 su na jiran a biya su.
Ya ce jihar ta na da gidaje 231,870 a rubuce a Rajistar Al’umma ta Jiha.
Ya yi kira ga Gwamnatin Tarayya da ta faɗaɗa shirye-shiryen ta na agaza wa al’umma don shigar da mutanen da su ke jira a rubuta su.
Jigon Ranar Matan Karkara ta Duniya ta bana dai shi ne “Gina Jimirin Matan Karkara a Zamanin Annobar Korona”, wato ‘Building Rural Women’s Resilience in the Wake of COVID-19”.
