HUKUMAR Zaɓe ta Ƙasa (INEC) ta yi kira ga sarakunan gargajiya a Jihar Ondo da su taimaka wajen ganin masu zaɓe sun tabbatar da zaman lafiya da bin ƙa’idojin kare kai daga annobar korona a zaɓen gwamna da za a yi a jihar a ranar 10 ga Oktoba.
Shugaban hukumar, Farfesa Mahmood Yakubu, shi ne ya yi wannan kiran a ranar Alhamis lokacin da ya yi wani zama a garin Akure da sarakunan da ke jihar kan batun zaɓen.
Yakubu ya ce an zo taron ne domin a nemi goyon bayan sarakunan don su ja hankalin talakawan su kan buƙatar da ke akwai ta tabbatar da zaman lafiya da guje wa tashin hankali a dukkan tsawon lokacin da za a yi zaɓen da ma bayan zaɓe.
Ya ce: “A taƙaice, mu na neman tallafin ku ne ta hanyoyi uku. Na farko, ku ci gaba da kira ga jam’iyyun siyasa da ‘yan takara da magoya bayan su da su rungumi zaman lafiya, kamar yadda ku ka saba yi, a yankunan ku.
“Na biyu, ku yi kira ga al’ummar ku da su bi ƙa’idojin kare lafiyar su da ta jama’a daga kamuwa da cuta.
“Wannan zaɓe ne da za a yi shi a zamanin da ake fama da annobar cuta a duk duniya – wato annobar cutar korona. Ya na da muhimmanci ga masu zaɓe su kaɗa ƙuri’ar su kuma su tafi gida ba tare da ɓata lokaci ba.
“Na uku, mu na neman addu’ar ku don a samu zaman lafiya a Jihar Ondo. Kuma mu na neman addu’ar ku ga INEC don zaɓen da za a yi a ranar Asabar ya kasance cikin lumana da adalci, kuma ba tare da nuna bambanci ba, sannan ingantacce.
“Zaɓen Ondo ya yi kyau. Mun duƙufa wajen ganin cewa na Ondo ma ya fi shi. Mun yi hakan a 2016. Wannan hukumar ta yi wancan zaɓen duk da fargabar da lulkiɓe zukata kafin zaɓen.
“Ya na daga cikin zaɓuɓɓuka mafi kyau da hukumar ta gudanar ta yadda ya kasance shi kaɗai ne zaɓen gwamna da aka yi a tarihin Jihar Ondo tun daga 1999 wanda ba a je kotu kan sakamakon sa ba.”
Farfesa Yakubu ya ce a yayin da ake gudanar da zaɓen a zamanin cutar COVID-19, INEC ta na ƙoƙarin ganin an yi shi lafiya lau, bisa shawarar Kwamitin Shugaban Ƙasa kan Cutar Korona da Cibiyar Yaƙi da Cututtuka ta Nijeriya.
Ya ce, “INEC za ta samar da takunkuman fuska, gilasan fuska, magungunan mantaleta da auduga saboda share injinan karanta katin zaɓe masu aiki da ƙwaƙwalwa a duk lokacin da aka tantance wani mai zaɓe, kuma za a samar da maganin fesawa a hannu.
“Kwamitin Shugaban Ƙasa kuma ya taimaka mana da na’urar auna ɗumin jiki da za a yi amfani da ita a kowace rumfar zaɓe.
“Duk da haka, a duk inda aka samu wani mai zaɓe ko ma’aikacin INEC ko jami’in tsaro ya nuna alamun kamuwa da cutar, to mun shirya da ‘yan Kwamitin Shugaban Ƙasa da ‘yan rundunar yaƙi da korona na Jihar Ondo su yi saurin ɗauke wannan mutum zuwa cibiyoyin su inda su ke aje masu fama da cutar don a ba su magani.
“Daga darasin da na koya a Jihar Ondo, na ga cewar mutane ba su kula sosai da bada tazarar da aka ce su riƙa ba junan su.
“Mun yi amanna da cewa ku sarakuna masu martaba za ku iya taimaka mana wajen yin amfani da ƙarfin muryar ku ku yi kira ga jama’a da su bi muhimman ƙa’idojin kiyaye lafiya.
“Hakan zai ƙarfafa saƙon da mu ka bayar cewa ba za a yarda wani mai zaɓe ya yi zaɓe ba har sai ya saka takunkumin fuska. Babu takunkumin fuska, babu yin zaɓe.”
Shugaban ya tabbatar wa da sarakunan cewa hukumar sa ta shirya sosai domin gudanar da zaɓen, ya na mai jaddada cewa INEC za ta kiyaye dokar ta ta ƙin nuna bambanci ga kowa a zaɓen kuma za ta yi aikin ta kamar yadda doka ta tanadar.
Ya ce, “Masu zaɓe a Jihar Ondo kaɗai ne za su yanke hukunci kan wanda zai zama gwamnan su na nan gaba a ranar Asabar, 10 ga Oktoba.”
Tun da farko a nasa jawabin a taron, Oba Frederick Akinruntan, wanda shi ne Olugbo na Ugbo kuma shugaban majalisar sarakunan gargajiya ta Jihar Ondo, ya yaba wa shugaban na INEC da ita hukumar kan aikin da su ka yi a zaɓen gwamnan Jihar Ondo.
Daga nan Akinruntan ya yi kira ga hukumar da ta yi irin wannan aikin a Jihar Ondo wajen tabbatar da cewa an yi zaɓen cikin nuna rashin fifiko ko wariya, kuma cikin inganci.
