ƘUNGIYAR Masu Shirya Finafinai ta Nijeriya (MOPPAN) ta maka wani matashi ɗan TikTok mai suna Ahmed Pasali a kotu bisa zargin sa da yaɗa kalamai na ɓata suna da kuma ƙazafi da ya yi ga wasu jarumai da ma Kannywood baki ɗaya.
Jami’in yaɗa labarai na ƙungiyar, Malam Ibrahim Amarawa ya ba da sanarwa a takardar manema labarai a daren jiya Asabar cewa, “Shi dai Ahmed Pasali ya yi wannan katoɓara ne a wani faifan bidiyo da ya karaɗe shafukan sada zumunta, inda hakan ya sa ƙungiyar ta MOPPAN ta garzaya ta yanko masa sammaci a wata babbar kotu da ke garin Jos domin ganin ya fuskanci hukunci.”
Amarawa ya ce tuni dai Upper Area Court da ke Kasuwar Nama ta umarci Pasali da ya bayyana a gaban ta ranar Litinin, 4 ga Maris, domin fuskantar tuhumar da ake masa.
Da yake ƙarin haske kan lamarin, Shugaban MOPPAN na ƙasa, Malam Maikuɗi Umar Cashman, ya ce, “Wannan sabon shugabanci na MOPPAN ya sha alwashin cewa ba zai saurara wa duk wani wanda ya yi yunƙurin ɓata suna ko ɓatanci ga ‘ya’yan wannan masana’anta ta Kannywood ba.”
