A JIYA Juma’a, 25 ga Nuwamba, 2022 aka ɗaura auren babban ɗan shahararren daraktan nan na Kannywood, marigayi Tijjani Ibrahim, wato Saleem.
Mujallar Fim ta ruwaito cewa an ɗaura auren Saleem Tijjani Ibrahim da sahibar sa, Kaltume Zubairu, da misalin ƙarfe 2:00 na rana a masallacin Juma’a na Garu da ke Fadar Sarkin Dutse, Jihar Jigawa, a kan sadaki N50,000.
Wamban Dutse da Farfesa Ado Bala su ne su ka karɓar wa ango aure, Barwan Dutse kuma waliyin amarya.
Waɗanda su ka halarci ɗaurin auren sun haɗa da Group Captain Suleiman Adamu (rtd), Alh. (Dr.) Ishaq Hadejia (Manajan Daraktan gidan Talbijin na Jigawa), Ma’ajin Hadejia, Ɗanburan ɗin Dutse, ma’aikatan Gidan Talbijin da Rediyo na Jigawa, ma’aikatan Hukumar Ruwa ta Jihar Kano, ma’aikatan Gadawur Global Investment Ltd, da sauran ‘yan’uwa da abokan arziƙi.
Saleem ya yi wa mahaifiyar sa da ‘yan’uwa da abokan arziƙi godiya.
A ɓangaren Kannywood kuma ya yi godiya ga Farfesa Umar Farouk Jibril, Dakta Ahmad Muhammad Sarari, Alhaji Bashir Nayaya, Nasir B. Muhammad, Mika’il Isa Bin Hassan (Gidigo), Tijjani Ahmad (Continuity), Amin M. Auwal, Bello Minna, da Murtada Arewa24.
Allah ya ba su zaman lafiya da zuri’a ɗayyiba, amin.
