A YAMMACIN jiya Talata soshiyal midiya ta ɗauka ta ko’ina cewa tsohuwar jaruma a Kannywood Mansurah Isah da jarumi Aminu A. Shariff (Momoh) za su yi aure.
Labarin ya samo asali ne daga wani rubutu da jaruma Maryam Aliyu Obaje (Madam Korede) ta yi inda saka hoton jaruman da cewa, “Allahummabarik, ‘Jorda 2025’.”
Ta ƙara da cewa, “Mansura Isah & Aminu Shariff Momo, tomorrow if you no get kampala stay at home.”
Ganin wannan rubutu ya sa ko’ina ya ɗauka cewa Mansura da Momoh za su yi aure ne, ‘yan soshiyal midiya suka dinga yaɗawa.
Sai dai kuma a yau wani bidiyo ya ɓulla inda furodusa Abdul’aziz Ɗan Small ya ɗora bidiyon Mansurah, kuma ya rubuta: “On set Jorda with my director.”
Wannan ya nuna cewa lallai fim suke ɗauka mai suna ‘Jorda’, wanda aka fara ɗaukar sa a yau, kuma ita Mansurar ce daraktar fim ɗin da kan ta.
Mujallar Fim ta ruwaito cewa yanzu dai ta tabbata cewa zancen Mansurah da Momoh za su yi aure duk ji-ta-ji-ta ce.
