ƁARAYI masu garkuwa da mutane (kidinafas) sun sako tsohon Darakta-Janar na NYSC, Birgediya-Janar Maharazu Tsiga (ritaya), bayan sun tsare tsawon kwanaki 56.
Ɓarayin sun sace shi tare da wasu mutum tara a garin su, wato Bakori, Jihar Katsina, a ranar 5 ga Fabrairu, 2025.
Majiya ta ce bayan iyalin sa sun biya kuɗin fansa sai ɓarayin suka ci gaba da riƙe shi na tsawon makwanni.
Wasu sun ce naira miliyan 60 aka biya, amma wasu sun ce kuɗin sun ma ninka haka.
Wata majiya ta cikin gidan sa ta ce bayan an kai kuɗin sai ɓarayin suka ƙi magana har mako ɗaya, sannan suka tuntuɓi iyalin sa.
Majiyar ta ce: “An kai kuɗin, amma sai bayan mako guda, wato a ranar Talata, 11 ga Maris, sannan suka kira mu sannan muka ji muryar shi.”
Ya ce ɓarayin sun nemi a ƙara masu kuɗi, amma ba a ƙara masu ba.
“Ba a ƙara masu ko kwabo ba. Yanzu maganar da muke suna cikin Zamfara inda daga can za a ɗauki Janar ɗin zuwa Abuja.”
