JARUMI a Kannywood, Mustapha Musty, ya ce har yanzu ya na kallon kan sa a matsayin jarumin da ake damawa da shi, don haka lokaci bai tafi da shi ba.
Jarumin ya bayyana haka ne a lokacin tattaunawar sa da mujallar Fim dangane da rashin ganin sa a cikin harkar fim sosai.
Musty ya ce: “Ita harkar fim a yanzu ba kamar a lokacin baya ba ne, saboda a yanzu abubuwa duk sun sauya. Hakan ya sa wasu abubuwa za ka ga kamar babu su, to amma ba wai don babu su ba ne, lokaci ne ya sauya su.
“Yanzu idan ka duba, yanayin kayan aikin da ake amfani da su a baya ba irin na yanzu ba ne. An samu sauyi na kayan aikin waɗanda su ka fi sauƙin sarrafawa, don haka sai aikin ya yi yawa, kowa ma zai iya yi.
“Kuma a baya ana kai fim kasuwa ne a kasa, to yanzu an wuce wannan lokacin; sai dai ka yi fim ɗin ka ka sayar a gidajen talbijin ko kuma ka saka a soshiyal midiya, a yanzu a nan ake samun kuɗin.”
Da ya juya kan maganar rashin ganin sa kuwa, sai ya ce: “Ai kamar yadda aka samu cigaba a kayan aikin, haka ma a ɓangaren jaruman aka samu sauyi. Saboda an yi yawa, kowa da wajen da ya ke tafiya aiki.
“Don ka ga ni har yanzu jarumi ne da ake yayi, musamman waɗanda su ke kallon shirin ‘Kwana Casa’in’ ai su na gani na. Kuma ina fitowa a cikin wasu finafinan.
“Amma dai abin da na sani, harkar ce ta bunƙasa, don haka idan ba ka nan ka na can. Hakan ya sa idan mutum ba ya kallon inda ake yin aiki da jarumi sai ya ɗauka kamar ba ya fitowa ne.
“Ina yi wa jama’ar da su ke tare da ni da har su ke tambaya ta fatan alheri.”
