WANI sabon jarumi da ya fara haskawa a Kannywood, Bilal Mustapha, ya bayyana cewa jurewa da ya yi ne ta sa ya tashi a matsayin ɗan rawa a fim zuwa cikakken jarumi mai jan fim.
Bilal ya na ɗaya daga cikin jaruman da ake hasashen za su yi fice a masana’antar finafinan nan da ɗan wani lokaci.
Tauraruwar sa ta fara haske ne a cikin fim ɗin ‘Ina Da Mata’ inda ya fito a matsayin Buba.
A tattaunawar sa da mujallar Fim, Bilal ya bayyana irin gwagwarmayar da ya sha kafin ya samu kan sa a matsayin jarumi mai jan fim. Ya ce: “Tun ina yaro na ke sha’awar fitowa a fim, don haka a lokacin da na gama sakandare sai na ƙudiri niyyar cimma buri na. Sai na shigo harkar fim, ina ta fafutikar ganin na samu shiga.”
Ya ƙara da cewa: “A lokacin da na shigo, da harkar rawa na fara wadda in za a yi fim za a kira mu mu yi rawa. Kuma a lokacin ma a baya ake saka ni, amma dai ni ban damu ba, na san zuwa gaba zan zama wani abu.
“Sannan abin da ya ke ƙara mani ƙarfin gwiwa shi ne yadda mutane su ke cewa na iya rawa, kuma zan fi dacewa na fito a matsayin jarumi. To, wannan ya na sawa na ji ƙarfin gwiwa na ci gaba da yi. Don haka da na daure ka ga a yanzu na fara kaiwa ga matakin cimma buri na.
“A yanzu ina a matsayin jarumi wanda ya ke jan fim har guda biyu: na fito a matsayin jarumin ‘Ina Da Mata’ wanda na fito a matsayin Buba, sai kuma fim ɗin ‘Zo Mu Zauna’ da na fito a matsayin Ɗanladi.
“Duk inda na shiga a yanzu za ka ji an kira ni da Buba ko a kira ni da Ɗanladi.”
Jarumin ya ce, “A yanzu burin da na ke da shi a matsayi na na matashi shi ne na yi aure, kuma ina so na samar da wani kasuwancin nawa na kai na bayan harkar fim da zai zama ko da babu harkar fim, to ina da wata harkar da za ta riƙe ni.”
