WATA gidauniya mai suna ‘World Wide Initiative for Community Development and Global Healthcare’ ta naɗa fitacciyar jaruma Saratu Giɗaɗo (Daso) a matsayin jakadiyar ta domin cimma buƙatar ta ta bayar da gudunmawa ga mabuƙata a cikin birnin da ƙauyuka.
A ranar Talata, … ga Janairu, 2020 ƙungiyar ta gudanar da taron ta na shekara a Kano, inda aka karrama fitattun mutane cikin su kuwa har da ita Saratun.
Baya ga karrama Saratu da aka yi, sai aka naɗa ta a matsayin jakadiya domin tare da ita za a riƙa tafiya a matsayin ta na wadda aka san fuskar ta saboda ta riƙa wayar da kan jama’a dangane da ayyukan ƙungiyar.
A ƙaton satifiket ɗin naɗin nata da aka ba ta, wadda jagorar gidauniyar, Dakta Baraka Sani, ta rattaba wa hannu, an nuna cewa za ta yi wannan aiki ne a tsawon shekara ɗaya, wato daga ranar 1 ga Janairu zuwa ranar 31 ga Disamba, 2020.
Wakilin mujallar Fim ya ji ta bakin Saratu Giɗaɗo dangane da wannan aiki da aka ɗora mata, inda ta bayyana cewa, “An naɗa ni jakadiya ne domin kasancewa ta wadda aka san fuskar ta a duniya, domin haka za mu yi aiki tare da su.
“Duk inda za su je, idan ina da lokaci sai mu tafi tare da su domin wayar da kan jama’a, musamman ma dai na ƙauyuka, don ka san irin wannan idan baƙuwar fuska ya je zai yi wa mutanen da ba su san shi ba bayani zai yi wuya su karɓi abin da ya zo masu da shi duk kyaun sa, amma idan sun saba da ganin fuskar mutum, to domin su gan shi ma su tsaya kuma har su saurari abin da zai faɗa.
“Amma ni dai matsayi na a ƙungiyar shi ne jakadiya, don haka ina tare da su a wannan matsayin ne.”
Ba wannan ba ne karo na farko da wasu ƙungiyoyi ko kamfanoni su ke ɗaukar ‘yan fim ɗin Hausa a matsayin jakadun su domin tallata manufar su ga jama’a.
