DUK da ɗimbin jama’ar da su ka taru a taron rantsar da sabon Gwamnan Jihar Kano, Abba Kabir Yusuf, a ranar 29 g Mayu, hakan bai hana jarumai da kuma mawaƙan Kannywood ɗaukar hankalin mahalarta ba.
‘Yan Kannywood ɗin dai sun haskaka wajen da waƙoƙi da kuma dirama da su ka gabatar a dandamalin taron inda su ka samu kyakkyawan yabo da kuma jinjina daga ɗimbin jama’ar da ta taru domin gane wa idon su rantsarwar.
Fitattun mawaƙan da su ka gabatar da waƙa a wajen sun haɗa da Abubakar Sani, Sadi Sidi Sharifai, Yakubu Muhammad, Sani Danja, Maryam A. Baba, Nazifi Asnanic da jarumar TikTok ɗin nan, Murja Ibrahim Kunya.
Su ma jarumai ba a bar su a baya ba wajen baje kolin tasu fasahar. Fitattun jarumai irin su Abba Al-Mustapha, Rabi’u Daushe, Abdullahi Adamu Abdullahi, da Abale sun gwada fasahar su, kowanne sanye da jar hula ko jan ɗankwali.
Baya ga haka akwai wasu masu gudanar da sana’ar fim da su ka halarci wajen, kamar Salisu Muhammad Officer, Umar Ƙofar Mazugal, Sunusi Oscar, da Alhassan Kwalle.
Mujallar Fim ta ruwaito cewa a baya yawancin ‘yan Kannywood sun ƙaurace wa yaƙin neman zaɓen Abba Gida-Gida, sun tare a inuwar jam’iyyar APC. Hakan ya sa ake ganin kamar gwamnatin sa ba za ta tafi tare da su ba, amma halartar waɗannan manyan jarumai da mawaƙan ya tabbatar da cewa su ma za a dama da su. Tuni ‘yan fim da suke da alaƙa da gwamnatin su ka fara zawarcin kujerar Hukumar Tace Finafinai ta Jihar Kano.
