FITACCIYAR jaruma kuma furodusa a Kannywood, Rahama Sadau, za ta kafa tarihi a Kannywood inda fim ɗin ta, ‘Mati A Zazzau’, zai kasance shirin Hausa na farko da ya hau manhajar Netflix.
Rahama da kan ta ta bada bayanin cewa za a ɗora ‘Mati a Zazzau’ kan manhajar a ranar 30 ga Disamba, 2023.
Fim ɗin na haɗin gwiwar kamfanin Asmasan Pictures da Sadau Pictures, ya fara fitowa ne tun a ranar 7 ga Fabrairu, 2020 lokacin da aka nuna shi a gidan sinima a Kano. Daga lokacin ba a ƙara jin ɗuriyar shi ba sai yanzu.
A sanarwar da ta bayar a soshiyal midiya, ta ce: “Fim ne mai ƙayatarwa, fim ne mai nishaɗantarwa, sannan kuma shi ne fim na farko da za a fara sakawa a kan manhajar Netflix. Wannan ba ƙaramin abu ba ne. Kada ku bari a ba ku labari.”
Mujallar Fim ta ruwaito cewa kafin dai wannan lokacin, ‘yan Kannywood da dama sun sha son su ga yadda kamfanin Netflix zai karɓi fim ɗin su domin haskawa a dandalin finafinai mafi girma inda za su samu ƙazamar riba tare da sanayya.
Netflix kan sayi fim ɗin Nijeriya a kan zunzurutun kuɗi daga $10,000 har zuwa $90,000.
Mashirya fim a kudancin Nijeriya sun daɗe da samun karɓar finafinan su a Netflix, domin yanzu haka akwai finafinan Nollywood kusan 30 a manhajar.
‘Mati A Zazzau’ zai kasance zakaran gwajin dafi a wannan fage, kuma zai buɗe wa sauran ‘yan Kannywood ƙofar da za su bi a karɓi finafinan su a Netflix.
A da, sun riƙa cin kasuwar finafinan da ake nunawa ta hanyar intanet ne ta manhajar Northflix da kuma kallo.ng.
Ban da Netflix, manhaja ta gaba ita ce Amazon Prime Video. A nan, ba a san wanda ƙarya ƙwarin ba.
‘Mati A Zazzau’ ci-gaban shirin ‘Mati Da Lado’ inda bayan Mati ya tsere daga ƙauyen su sai ya isa Zazzau ya shiga faɗi-tashin yadda zai ci gadon dukiyar da uban sa attajiri ya mutu ya bari a hannun abokin sa.
Yakubu M. Kumo ne ya rubuta labarin, Yaseen Auwal ya yi daraktin, yayin da jaruman shirin su ka haɗa da Sadiq Sani Sadiq (Mati), Rahama Sadau (Rama), Hadiza Blell (Madina), Umar Gombe (Garba), Jamila Nagudu (Asabe), Rabi’u Rikadawa (Barau), Aminu Sharif Ahlan (Ilyasu), Tahir I. Tahir (Lado), da Adam A. Zango (Yarima).
