ƘUNGIYAR masu shirya finafinai ta Kadawood da ke Kaduna (Kadawood Filmmakers and Entertainers Association) ta nesanta kan ta daga ayyukan da wani matashi ɗan fim mai suna Aliyu Musa (Mero) yake aikatawa a soshiyal midiya, ta ce iskanci da rashin tarbiyya ne.
A cikin ‘yan kwanakin nan, an ga wasu guntayen bidiyo a kafofin sada zumunta inda Mero yake aikata wasu abubuwa da suka danganci batsa, abin da bai yi wa ‘yan Kannywood da dama daɗi ba.
A cikin wata sanarwar musamman da ya fitar a yau, Shugaban Kadawood, Malam Nura MC Khan, ya ce: “Muna so mu sanar da al’umma cewa hukumar Kadawood Filmmakers and Entertainers Association ta samu labarin wani yaro mai suna Aliyu Musa (Mero) wanda yake wallafa bidiyo masu ɗauke da iskanci, rashin tarbiyya, da abubuwan da ba su dace da al’ada da ƙimar al’umma ba.
“Muna bayyana a fili cewa:
1. Babu wata alaƙa ko haɗin kai tsakanin mu da wannan yaro.
2. Ba ma goyon bayan duk wani abu da ya shafi irin waɗannan munanan halaye.
3. Irin waɗannan bidiyo ba sa wakiltar masana’antar film na Jihar Kaduna ko ƙa’idojin da muka tsaya akai.”
Ƙungiyar ta yi kira ga duk ‘yan fim, masu shirya fim, da sauran ƙungiyoyin masana’antar film a Jihar Kaduna da su fito fili su barrantar da kan su daga Aliyu, “domin kada a danganta wannan iskanci da harkar fim.”
Ta ƙara da cewa, “Muna kuma ba da shawara mai ƙarfi cewa kada a sake saka shi a cikin kowace irin harkar fim ko ɗaukar aiki a ƙarƙashin dukkanin ƙungiyoyi ko kamfanonin shirya finafinai.
“Masana’antar fim ta Kaduna masana’antar tarbiyya ce, wadda take fitar da saƙo mai ma’ana ga jama’a—not wurin yada abin da zai ɓata tarbiyya ko karya mutunci.”
Ta yi godiya ga duk masu goyon bayan tsaftar harkar fim, tare da addu’ar “Allah ya ƙara mana zaman lafiya da cigaba.”
