TSOHUWAR matar jarumi Adam A. Zango, wato Maimuna Musa (Pretty), ta bayyana cewa ta kammala lokacin iddar ta bayan rabuwar ta da tsohon mijin ta.
Maimuna ta bayyana hakan ne a soshiyal midiya, inda ta ce a ranar 15 ga Satumba, 2026, ta kammala iddar da aka wajabta mata.
“Yau 15 ga watan Satumba, 2026, na kammala idda ta. Ina gode wa Allah da Ya ba ni ƙarfi da haƙurin tsallake wannan lokaci,” ta rubuta.
Ta ƙara da cewa ta yanke shawarar barin abubuwan da suka faru a baya a matsayin darasi, tare da yafe wa duk wanda abin ya shafa daga zuciyar ta.
“A yau, na zaɓi in bar duk abin da ya wuce a matsayin darasi. Na yafe daga zuciya ta, kuma ina roƙon Allah Ya yafe mana kurakuran mu,” inji ta.
Da take magana kan Zango, jarumar ta yi masa fatan alheri da zaman lafiya, tare da roƙon Allah Ya albarkaci rayuwar sa.
Maimuna ta ce: “Ga tsohon miji na, ina maka fatan alheri da zaman lafiya a duk inda rayuwa ta kai ka. Allah Ya albarkaci rayuwar ka, Ya ba ka farin ciki da kwanciyar hankali, Ya kuma shiryar da mu baki ɗaya zuwa ga abin da Ya yarda da shi.
“Allah Ya sa abin da ke gaba ya fi abin da ya wuce kyau, Ya buɗe mana ƙofofin rahama da alheri.”
