CIBIYAR Aikin Jaridar Bincike ta Wole Soyinka (WSCIJ) ta naɗa fitaccen mai ɗaukar hoton nan, Malam Sani Mohammed Maikatanga, a matsayin ɗaya daga cikin alƙalan da za su tantance ayyukan da aka gabatar domin gasar Kyautar Wole Soyinka ta Rahoton Binciken ’Yan Jarida (WSAIR) karo na 21.
Gasar, wadda ake gudanarwa a duk shekara, tana karrama ’yan jaridar Nijeriya waɗanda ayyukan su suka nuna ƙwarewa a fannin bincike, bin ƙa’idojin aikin jarida, ƙirƙira da jajircewa wajen kare muradun al’umma.
A cikin wasiƙar naɗin da Babbar Darakta kuma Babbar Jami’ar Gudanarwa ta WSCIJ, Motunrayo Alaka, ta rattaba wa hannu, ta bayyana cewa Maikatanga zai taka muhimmiyar rawa wajen tabbatar da sahihanci da adalci a gasar, tare da taimakawa wajen zaɓen fitattun ayyukan jarida masu zurfin bincike a Nijeriya.
Wasiƙar ta bayyana cewa bayan Kwamitin Tantance Ayyukan da aka Gabatar ya kammala aikin tantancewa na farko, za a miƙa ayyukan da suka cancanta ga kwamitin alƙalan domin gudanar da cikakken nazari da ba su maki bisa ƙa’idojin gasar da kuma ra’ayoyin su masu zaman kan su.
Haka kuma, mambobin kwamitin za su halarci zaman tantancewa da tattaunawar alƙalai, inda za su yanke shawarar ayyukan da za su kai matakin ƙarshe da kuma waɗanda za su lashe kyaututtukan.
Cibiyar ta WSCIJ ta jaddada aniyarta ta ci gaba da karrama ’yan jaridar Nijeriya waɗanda suka nuna ƙwarewa, ƙirƙira, jajircewa wajen kare ƙa’idojin aikin jarida da kuma sadaukarwa wajen yi wa al’umma hidima.
Gasar ta shekarar 2026 za ta karrama ƙwarewa a fannoni shida, waɗanda suka haɗa da jaridu da mujallu, rediyo, talbijin, ɗaukar hotunan labarai, kafafen intanet da kuma zane-zanen barkwanci masu sharhi kan al’amuran yau da kullum.
Da yake mayar da martani kan naɗin, Maikatanga ya nuna godiyar sa ga cibiyar bisa amincewar da ta yi da shi, yana mai bayyana farin cikin sa na kasancewa cikin waɗanda aka zaɓa domin tantance ayyukan ’yan jarida a wannan muhimmiyar gasa.
Maikatanga tsohon editan mujallar Fim ne, inda ya bayar da gudunmawa wajen gudanar da ayyukan mujallar kafin ya bar muƙamin a shekarun baya. Ya kuma yi fice a fannin ɗaukar hotunan labarai.
