ALLAH ya yi, shi ma matashin mawaƙi a Kannywood, Buhari Yusuf, wanda aka fi sani da Abba Zakin Hausa, zai yi bankwana da kwanan situdiyo.
Za a ɗaura auren Abba da abar ƙaunar sa Asiya Muhammad da misalin ƙarfe 1:00 na rana a Masallacin Juma’a da ke tsohuwar kasuwar unguwar Ɗan Magaji, a Zariya, Jihar Kaduna, a ranar Juma’a, 19 ga Mayu, 2023.
Da ya ke sanar da gayyatar ɗaurin auren nasa, Abba Zakin Hausa ya rubuta cewa, “Lokacin da aka daɗe ana jira ya zo. Ina farin cikin gayyatar ku zuwa ɗaurin aure na wanda zai gudana kamar yadda ku ka gani a jikin wannan katin. Akwai walima a ƙofar gidan baban ango da zarar an kammala ɗaurin aure.”
To Allah ya kai mu.
