BIKIN auren Sarra Tasi’u Ya’u Ɓaɓura, ‘yar marubuciya kuma malama a Jami’ar Alqalam, Hajiya Bilkisu Yusuf Ali, taro ne na kece raini.
An ɗaura auren Sarra da angon ta, Salihu Ibrahim Darma (Khalifa), a ranar Juma’a a gidan Imam Sheikh Yusuf Ali da ke Tudun Maliki, Kano, da misalin ƙarfe 2:30 na rana.
Bayan ɗaurin auren, uwar amarya ta shirya taron wuni a wajen taro na Darul Tauhid da ke Titin Zariya inda ‘yan’uwa su ka haɗu su ka taya ta murna.
A jiya Asabar kuma aka shirya babbar liyafa ta cin abinci.
Wannan liyafar ta kece raini ce, domin kuwa taro ne da aka shirya na gani na faɗa. Shi kan sa wurin taron, Prime Events Centre da ke Titin Haɗeja, wuri ne na alfarma.
An tsara wajen zama rukuni-rukuni: na masoyan uwar amarya da ‘yan’uwa da kuma ƙawaye da abokan aiki marubuta; marubuta maza da marubuta mata, sai kuma ‘yan fim mata da su ka je a ƙarƙashin jagorancin Hauwa Edita.
Su ma abokan karatun amaryar na sakandaren Kano Capital School su ma wajen su daban, sai kuma babbar gayya, iyalan marigayi Sarkin Malaman Masarautar Gaya, Imam Sheikh Dr, Yusuf Ali, tare da dangin miji su ma wajen su daban.
Amarya ta shigo tare da ƙawayen ta da dangin miji, sannan shi ma ango ya shigo tare da abokan sa.
An fara bikin da misalin ƙarfe 9 na dare a lokacin da tawagar uwar amarya ta shigo ɗakin taron tare da rakiyar marubuta mata.
Hajiya Umma Sulaiman ‘Yan’awaki ce ta buɗe taron da addu’a, yayin da Hadiza Nuhu Gudaji ta yi jawabin maraba.
An yi biki da bireɗe, an cashe iya son rai. Sannan an ci an sha an yi hani’an, abin sai wanda ya gani.
