BAYAN kammala ginin katafaren gidan sa da ya yi, darakta a Kannywood, Malam Aminu Saira, ya shirya wata gagarumar walima domin nuna farin cikin sa da kuma godiyar sa ga Allah bisa ni’imar da ya yi masa.
An yi walimar a jiya Juma’a a gidan da ke unguwar Sharaɗa NNDC Quarters a cikin garin Kano.
Taron, wanda aka fara shi daga ƙarfe 5 na yamma zuwa bayan magariba, ya samu halartar manyan jarumai da daraktoci tare da ‘yan’uwa da abokan arziki.
Tun da farko da yake jawabin maraba, Saira ya bayyana cewa, “Na kira wannan taron tare da shirya walima dangane da damar da Allah ya ba ni ta kammala ginin gida da na yi, wanda a gare ni shi ne abu mafi muhimmanci a rayuwa ta ta yanzu.
Alhamdu lillah, a yanzu wannan waje na kammala aikin sa, don haka ina godiya ga dukkan waɗanda suka amsa gayyatar da na yi domin na ga masoya na da dama da muka daɗe ba mu ga juna ba.
“Babu shakka, fuskokin da na gani a wannan waje suna da muhimmanci a waje na, domin na ga iyayen gida na da abokan aiki na, har ma da abokai na yarinta duk sun haɗu a wannan waje, don haka ina godiya sosai, Allah ya bar zumunci.”
Bayan ya kammala jawabin, sai aka shiga cin abincin da aka tanadar wa mahalarta taron, abinci kala-kala na alfarma wanda kowa ya ci iya buƙatar sa.
Da aka gama, sai aka zagaya da jama’a lungu da saƙo na gidan domin ganin yadda yake. Gida ne dai da aka gina hawa biyu wanda ya ƙunshi ɓangaren iyali da na mahaifiyar sa da na yaran sa.
Haka nan akwai ɓangaren ganawa da baƙi, sai ofishin Saira Movies, da situdiyo da sauran su.
Babu shakka, za a iya kiran gidan da aljannar duniya, domin duk da manyan gidaje da ake ganin ‘yan fim sun gina, idan gasar nuna gida za a yi a masana’antar Kannywood a yanzu Malam Aminu Saira sai iya lashe gasar.
Duk wanda ya ga gidan ciki da waje ya san cewa an kashe kuɗin masu yawa.
‘Yan fim da suka je wajen sun haɗa da Hamisu Lamiɗo Iyan-Tama, Bala Anas Babinlata, Salisu A. Fulani, Abdullahi Hikima, Abale, Yasir Auwal, Nura Mado, da ƙanen maigidan, wato mawaƙi Naziru M. Ahmad, da wasu ma.
Kowa na addu’ar Allah sa rai aka yi wa.
