FITACCEN mawaƙin Hausa na masana’antar Kannywood, Muhammad Yunusu, wanda aka fi sani da Kawu Ɗan Sarki, ya shiga sahun angwayen ƙarshen watan Agusta, bayan an ɗaura masa aure da sahibar sa, Aisha Abubakar Muhammad.
An ɗaura auren ne a yau Asabar, 22 ga Agusta, 2026, a gidan Isa Gambo da ke unguwar Rijiyar Zaki Rumfar Shehu, cikin birnin Kano, da misalin ƙarfe 11 na safe.
Ɗaurin auren ya samu halartar ‘yan fim da mawaƙa da dama daga Kannywood, waɗanda suka je domin taya sabon ango murna tare da nuna masa goyon baya.
Daga cikin fitattun waɗanda suka halarci wajen ɗaurin auren akwai mawaƙi Nura M. Inuwa, darakta Isma’il Khalil Ja’en, Lawan Ahmad da Daddy Hikima, tare da sauran abokan sana’a da ‘yan uwa.
Auren Kawu Ɗan Sarki ya ƙara kasancewa ɗaya daga cikin muhimman al’amuran da suka ɗauki hankalin masu bibiyar masana’antar Kannywood a wannan ƙarshen watan na Agusta.
